Завхан аймаг нь нийслэл хотоос 1050 км алслагдсан баруун бүсийн томоохон аймгуудын нэг юм. Завхан аймагт хүн амын өргөн хэрэглээний бараа болох гурил болон малын тэжээл зах зээлийн дундаж үнээс өндөр байдгаас хүн амын худалдан авах чадвар амьжиргааны түвшинд сөргөөр нөлөөлсөөр ирсэн. Энэ бүхнийг нутгийн хүү УИХ-ын гишүүн Ш.Сайхансамбуу орон нутагтаа ирж ажиллах үеэрээ харж аймгийнхаа иргэдэд гурил болон малын тэжээлийг хямд үнээр тогтвортой нийлүүлэх зорилт тавин ажилласны үр дүнд түүний санаачлагаар “Өгөөмөр” гурилын үйлдвэр Улиастайд үүд хаалгаа нээлээ.

“Нарантуул Шим” компанийн “Өгөөмөр” гурилын үйлдвэр нь Герман, Хятадын хамтарсан сүүлийн үеийн техник технологиор тоноглогдсон бөгөөд хоногт 40 тонн гурил, 10 тонн тэжээл үйлдвэрлэх хүчин чадалтай, 35-40 хүнийг ажлын байраар хангаж ажиллах юм. Алдархаан сумын нутаг Борхын голын бэлчир дэх Өгөөмөрийн үржил шимтэй Шар талд ургасан улаан буудайгаар үйлдвэрийнхээ гол түүхий эдийг хангаж байна.

“Үйлдвэржилтийг дэмжих жил”, “Атарын III аян”-ны хүрээнд Завхан аймгийн болон цаашид монгол орны баруун бүсийн аймгуудын гурилын хэрэгцээг хангахад чиглэгдсэн “Өгөөмөр Агро” төсөл УИХ-ын гишүүн Ш.Сайхансамбуугийн санаачилгаар гурван жилийн судалгаа туршилтын дүнд 35 тэрбум төгрөгийн хөрөнгө оруулалтаар энэ төсөл хэрэгжиж эхэлжээ. Төслийн хүрээнд Алдархаан сумын Шар тал хүртэл 42 км-т цахилгаан дамжуулах 10квт-ын агаарын шугам татаж цахилгааны эх үүсвэрээр хангажээ.

Мөн Борхын голоос ус татах хоолой, 300 метрийн урттай үерийн далан, 220 метрийн ус дөхүүлэх суваг, толгойн барилга, ус хуримтлуулах усан санг байгуулж 500 метрийн радиусаар эргэдэг усалгааны систем бүхий бүрэн автомат усжуулалттай талбайг 1.7 тэрбум төгрөгийн хөрөнгө оруулалтаар шийдвэрлэж өгсөн нь Завхан аймагт газар тариаланг хөгжүүлэх шинэ алхам боллоо. Шар талын тариалалт нь өндөр мэргэжлийн агрономичийн зөвлөгөөгөөр ОХУ-аас олон улсын чанарын батламж бүхий супер элит сортын шинэ үрийн улаан буудайг монгол орны хөрсөнд анх удаа нутагшуулан амжилттай тариалж энэ жилээс ургацын дээж анхны бүтээгдэхүүнээ аймгийнхаа хэрэглэгчдэд түгээж эхэллээ. Ийнхүү алслагдсан хэмээн хэд нугарсан бараа бүтээгдэхүүн хэрэглэдэг байсан Завханчууд маань энэ жилээс мах,  гурилын үнэ- д санаа зоволтгүй боллоо. Нарантуул шим ХХК-ний Өгөөмөр гурил нь 25 кг-аар савлагдсан I, II зэргийнх бол малын тэжээл нь 50 кг-аар савлагдаж борлуулагдаж байна.