“Red Bull” багийн нисгэгч Себастьян Веттель өчигдөр болж өнгөрсөн Японы гран-при уралдаанд гараанаас бариа хүртэл тэргүүллээ алдалгүй явсаар тэргүүлж, дэлхийн аваргын төлөөх өрсөлдөөнд тун ойрхон орж ирлээ. Герман нисгэгч Веттелийн багийн хамтрагч Марк Уэббер түүний араас бариалсан бол гуравт Ferrari-гийн Фернандо Алонсо барианд орсон байна. Харин McLaren багийн хамтрагчид болох Женсон Баттон, Льюис Хэмилтон нар удаахь байруудад шалгарчээ.
Улирлын 16 дахь гараа болох Японы гран-пригийн дараах байдлаар Уэббер 14 онооны давуугаар ерөнхий дүнгээр тэргүүлж байгаа бол Алонсо, Веттель нар ижил 206 оноотой удаалж байна. Харин Хэмилтон /192 оноотой/, Баттон /189 оноотой/ нар дөрөв болон тавдугаарт бичигдээд байгаа юм.
“Формула нэг”-ийн 2010 оны аварга тодроход ердөө гурван гараа үлдээд буй энэ үед Хэмилтон тэргүүлэгчээс 28 оноогоор тасарч, аваргын цом хүртэх боломж нь бараг л үгүй болж байна.
Харин зохион бүтээгчийн цомд “Red Bull” 426 оноотой тэргүүлж байгаа бол 381 оноотой McLaren хоёрт, 334 оноотой Ferrari гуравдугаарт эрэмбэлэгдлээ.

Ш.Тэргэл