Жил бүр уламжлал болгон зохиогддог “Барилга, орон сууц- 2011” үзэсгэлэн ирэх дөрөвдүгээр сарын 22-25 хооронд “Мишээл экспо”-д зохион байгуулагдах гэж байна. “Барилга, орон сууц 2011” үзэсгэлэнд барилгын ажил гүйцэтгэгч компаниуд, барилгын материалын импортлогчид болон үйлдвэрлэгчид, банк, банк бус санхүүгийн байгууллагууд оролцох юм. Мөн барилгын машин механизм тоног төхөөрөмж, барилгын цахилгаан, автомат, сантехникийн тоноглол, бага механикжилтийн машин, багаж хэрэгслүүд импортлон нийлүүлэгчид, үл хөдлөх хөрөнгө зуучлагч компаниуд оролцох гэнэ. Уг үзэсгэлэн яармаг шинэ орон сууц худалдан авахад банкны зээл болон лизингийн үйчилгээ ямар байгаа, барилгын материал, амины орон сууц, барилгын тоног төхөөрөмж, барилгын салбарт гарч байгаа дэвшилтэт техник технологи зэрэгтэй танилцах боломжийг олгож буй. Үзэсгэлэнгийн үеэр барилгын салбарын инженер техникийн ажилчид, эрдэм шинжилгээний ажилтан, оюутнуудын дунд онол практикийн бага хурал болох аж.. Мөн Барилга.МН сэтгүүлээс “Барилгын бүтээн байгуулалт” фото зургийн уралдааны шилдэг бүтээлүүдийг танилцуулна. Үзэсгэлэн яармагийн бүртгэл дөрөвдүгээр сарын 10-ныг хүртэл үргэлжилнэ.