Өнгөрсөн сарын 27-нд  Сүхбаатар аймгийн Сүхбаатар суманд хууль бусаар их хэмжээний цагаан зээр агнасан байна гэсэн иргэдийн мэдээллийн дагуу Аймгийн БОАЖГ, цагдаагийн хэлтэс хамтран шалгалт явуулахад Сүхбаатар сумын иргэн Өлзийхутагийн Цогтбаатар тахиж хүндэлдэг Дарханхаан уулынхаа өврөөс 2010 оны 12 дугаар сард 31 толгой цагаан зээр агнаж ойр орчмынхоо  айлуудад нэг хониор зургаан зээр, нэг ямаагаар таван зээр, нэг бяруугаар 20 зээр өгнө гэх мэтээр тохиролцон, хулгайгаар агнасныг илрүүлж холбогдох арга хэмжээ авчээ.

Зээр агнасан болон  Зээрийг авч идсэн иргэдийг тус бүрд нь  50 мянган төгрөгөөр торгож  Сүхбаатар сумын Төрийн сан банкны дансанд 200000 төгрөг, нөхөн төлбөрийн 2,480.000 төгрөгийг Аймгийн байгаль хамгаалах санд оруулахаар шийдвэрлэж, хууль бус ан агнахад  хэрэглэсэн Сайга, Калибрь маркийн хоёр бууг  Цагдаагийн хэлтэст хүлээлгэн өгчээ. Энэхүү явдлаас иргэд маань сургамж авч агнахыг хориглосон ан амьтны махыг худалдан авахгүй байх, хулгайн ан хийсэн этгээд, худалдан авсан та өөрөө ч бас давхар хуулийн хариуцлагад татагдах болно гэдгийг хуулийн байгууллагынхан анхааруулжээ.