“Дорнод” сонин, ТВ-6 телевизийн дэргэдэх 1803 утсаар авсан иргэдийн санал асуулгаар бар жилийн “Есөн алдартан” шалгаруулж шагнал гардуулав. Уг санал асуулганд орон нутгийн иргэд идэвхитэй оролцож 300 гаруй хүн саналаа ирүүлсэн байна. Тус сонины редакц, уншигчдын төлөөллөөс бүрдсэн дөрвөн хүний бүрэлдэхүүнтэй комисс гарч дүнг нэгтгэн санал авсан байдлаар нь алдартнуудыг тодруулжээ.

Дөрөв дэх жилдээ зохион байгуулагдаж буй уг шагнал гардуулах ажиллагаа саяхан аймгийн ЗДТГ-ын “Ёслол хүндэтгэлийн өргөө”-нд боллоо. “Есөн алдартан”-аар аймгийн Засаг дарга Ц.Жанлав, УИХ-ын гишүүн П.Алтангэрэл, “Адуун чулуун” компаний Захирал Б.Шатар, “Цогоктаэдр” компаний Захирал П.Цогбаяр, “Санбэйс” компаний Захирал С.Итгэл, аймгийн Улаан загалмайн хорооны дарга Б.Ганболд, Дашбалбар сумын Засаг дарга Ж.Ёндонжамц, Баян-Уул сумын ЕБС-ийн сурагч А.Уранбаяр, 12 дугаар цэцэрлэгийн багш Х.Нарантуяа нар шалгаран шагналаа гардав.