Tour of Spain буюу Ла Вуэлта мэргэжлийн дугуйн олон өдрийн уралдааны эцсийн гараа өчигдөр болж, тамирчид Испанийн нийслэл Мадрид хотноо орж ирснээр тэмцээний ялагч тодорлоо. “Liquikas” багт харьяалагддаг Италийн дугуйч Винчензо Нибали эцсийн 21 дэх гарааны дараачаар ерөнхий дүнгээр тэргүүлж, гурван долоо хоногийн турш үргэлжилсэн 2010 оны Испанийн тур уралдааны ялагч болсон байна. Сицилиэс гаралтай Нибали энэ жил 25 настай бөгөөд 1990 онд Марко Жиованнетти тус тэмцээнд түрүүлснээс хойш Ла Вуэлтад аваргалсан анхны итали дугуйч болж байгаа юм. Харин өчигдрийн 21 дэх гараанд АНУ-ын тамирчин Тайлер Фаррар түрүүлжээ.

Өнгөрсөн жилийн Tour de France уралдаанд ерөнхий дүнгээр долдугаар байрт шалгарснаас хойш Нибалигийн статус огцом өсч, “Их дуулга”-ын уралдаанаас цом хүртэх өндөр магадлалтай дугуйчдын тоонд зүй ёсоор багтах болсон юм. Тэрбээр мөн энэ жилийн Giro d’Italia-д гуравдугаар байрт шалгарч, харин түүний багийн анд Иван Бассо түрүүлсэн билээ.

Энэ жилийн Ла Вуэлта уралдааны тухайд Нибали ерөнхий дүнгээр тэргүүлж, уралдааны ялагч болсон бол “Cofidis” багийн дугуйч, Францын Дэвид Монкути шилдэг уулын дугуйчид олгодог эрээн цамцны эзэн болж, уралдааны туршид гурван гараанд түрүүлсэн Британийн Марк Кавендиш онооны улаан цамцны эзэн болжээ.