Бид өмнө нь арилжааны банкуудын зээлийн хүүгийн хэмжээг харьцуулсан мэдээллийг уншигчдадаа хүргэж байсан билээ. Энэ удаа банкуудын хадгаламжийн хүү ямар ялгаатай байгааг танилцуулж байна. Хадгаламжийн нэр төрөл олон янз учраас зөвхөн хугацаатай болон хугацаагүй хадгаламжийн хүүг харьцууллаа. Хугацаагүй хадгаламжийн тухайд ихэнх банк ойролцоо хэмжээний хүү амлаж байгаа бол хугацаатай хадгаламжид хүүгийн хэмжээ нэлээд ялгаатай байгаа юм. Өнөөдөр үйл ажиллагаагаа хэвийн явуулж байгаа арилжааны 12 банкны хугацаагүй хадгаламжийн жилийн хүүний дээд хэмжээ 8.4 хувь, доод хязгаар нь таван хувьтай байна. Энэ нь төгрөгийн хадгаламжийн хувь хэмжээ. Харин ам.долларын тухайд ихэнх банк 3.6 хувийн хүү санал болгосон байна. Мөн 1.8 хувь буюу нэлээд бага хүүтэй банк ч бий. Тодруулбал, Төрийн банк, ХААН банк хоёр ам.долларын хугацаагүй хадгаламжид 1.8 хувийн хүү тооцдог аж. Мөн ЭРЭЛ болон Худалдаа хөгжлийн банк адилхан 2.4 хувийн хүүтэй. Харин “Хас” банк хамгийн өндөр буюу 4.1 хувийн хүү санал болгожээ. Хадгаламжийн нөхцөлийн хувьд банкуудад гойд ялгарах зүйл байхгүй. Ерөнхийдөө адилхан. Зөвхөн ЭРЭЛ банк л энэ төрлийн хадгаламжид арай өөр нөхцөл тусгасан байгаа юм. Тус банкинд хугацаагүй хадгаламж эзэмшигч тухайн сард зарлагын гүйлгээ хийсэн бол идэвхтэй гэсэн ангилалд багтах бөгөөд төгрөгөөс зургаа, ам.доллараас 2.4 хувийн хүү авна. Харин тухайн сард зарлагын гүйлгээ хийхгүй бол идэвхгүй гэсэн ангилалаар төгрөгөөс 8.4, ам.доллараас 3.6 хувийн хүү авах юм. Тэгэхээр аль болох зарлагын гүйлгээ хийхгүй байвал таны авах хүүгийн хувь өндөр байна гэсэн үг. Банкуудын энэ төрлийн хадгаламжийн доод үлдэгдлийн хэмжээ харьцангуй бага байдаг. Ойролцоогоор 5-10 мянган төгрөг, тав, 10 ам.доллараас эхэлдэг байх жишээтэй. Энэ нь орлого багатай иргэдэд бага ч гэсэн хуримтлал бий болгоход нэлээд ач тустай бүтээгдэхүүн юм. Ер нь хугацаагүй хадгаламж нь харилцагч хүссэн үедээ орлого, зарлагын гүйлгээ хийж болдгоос эхлээд олон давуу талтай. Мөн энэ төрлийн хадгаламж нь Банкин дахь мөнгөн хадгаламжид баталгаа гаргах тухай хуулийн дагуу даатгагдсан хадгаламж болж буйгаараа онцлог. Гэхдээ Монголбанкны бодлогын хүүтэй харьцуулахад хугацаагүй хадгаламжийн хүү нэлээд бага түвшинд байгаа нь ажиглагдаж байна.
БОДЛОГЫН ХҮҮГЭЭС ӨНДӨР ХҮҮ
Хугацаатай хадгаламжийн тухайд ихэвчлэн хоёр сараас нэг жилийн хугацаатай байдаг. Харин хүү нь харилцан адилгүй байна. Өөрөөр хэлбэл, хоорондоо нэлээд хол зөрүүтэй байгаа юм. Жишээ нь, “Капитал” болон Тээвэр хөгжлийн банк төгрөгийн хадгаламжид хамгийн өндөр буюу 18, 18.5 хувийн хүү тус тус тооцдог. Энэ нь төв банкны бодлогын хүүгээс хол давсан үзүүлэлт юм. Бусад банкуудын төгрөгийн хадгаламжийн хүү ойролцоогоор 15, ам.долларынх дунджаар найман хувьтай байна. Харин ХААН банк хамгийн бага буюу төгрөгт 14, ам.долларт 3.6 хувийн хүү тооцдог аж. Гэхдээ л хамгийн бага гэгдэж байгаа төгрөгийн хадгаламжийн хүү төв банкны бодлогын хүүгээс даруй гурван хувиар өндөр байна. Уг нь өнгөрсөн долдугаар сард Банкин дахь мөнгөн хадгаламжид баталгаа гаргах тухай хуульд өөрчлөлт оруулах эсэхийг УИХ-аар хэлэлцэж байх үед хадгаламжийн хүү буурах нөхцөл бүрдэнэ гэсэн яриа хүчтэй тархаж байсан. Учир нь уг хуульд Монголбанкны бодлогын хүүтэй уялдуулан хүүгээ бууруулсан банкуудын хадгаламжид баталгаа гаргах тухай өөрчлөлт оруулахаар болсон юм. Үүнээс үүдэн банкууд хүүгээ бууруулж, улмаар харилцагчид хадгаламжаа татах эрсдэлтэй гэсэн чимээ тухайн үед дуулдаж байв. Гэвч өнөөдөр хадгаламждаа баталгаа гаргуулахын тулд хүүгээ 10 хувь хүртэл бууруулсан банк бараг алга гэхэд болно.
ХАДГАЛАМЖИЙН ХҮҮ ХЭТ ӨНДӨР БАЙЖ БОЛОХГҮЙ
Арилжааны банкуудын хадгаламжийн хүүг бууруулах талаар төрөөс баримталж байгаа бодлогыг буруутгах хүн байдаг. Нэг талаас хүү өндөр байх нь хадгаламж эзэмшигчдэд ашигтай мэт боловч нөгөө талдаа их мөнгөтэй хүмүүсийн бизнес болох эрсдэлтэй. Тийм ч учраас өндөр хүүтэй хадгаламжид төрөөс баталгаа гаргахаас татгалздаг. Харин төв банкны бодлогын хүүтэй уялдах хэмжээний хүүтэй хадгаламжид баталгаа гаргах нь бусад орны хувьд тогтсон жишиг юм. Ер нь санхүү, төлбөрийн чадварын хүндрэлд орсон болон орж болзошгүй банкууд хадгаламжийн бүтээгдэхүүндээ хэт өндөр хүү амлаж, өөрсдийн эрсдэл даах чадвараас давсан хөрөнгийг татан төвлөрүүлж эхэлдэг. Энэ нь банкны системийн зээлийн хүүгийн дундаж түвшинг бууруулахад ч сөргөөр нөлөөлөх нь бий. Урьд нь банкны актив хөрөнгө, баталгаа, батлан даалттай этгээд болон түүний холбогдох этгээдийн харилцах, хадгаламжид төрөөс баталгаа гаргадаг байсан. Энэ нь төлбөрийн чадваргүй болсон банкнаас зээл авсан харилцагч зээлийн өрөө төлөхөөс зайлсхийх, хариуцлага хүлээхгүй байх нэг шалтаг болж эхэлсэн. Тиймээс төрөөс батлан даах хөрөнгийн төрөл, хэмжээг хязгаарлах заалтыг хуульд нэмж тусгасан юм. Ингэснээр хадгаламжийн хүү боломжийн түвшинд тогтвортой байхаас гадна, банкуудыг санхүүгийн эрсдэлээс сэргийлэх боломж бүрдэнэ хэмээн найдаж байв. Гэвч харамсалтай нь төрөөс санаачлан хийсэн энэ ажлын үр дүн өнөөдөр төдийлөн гарахгүй байна.
Ч.ДАШДЭЛЭГ
Зохиогчийн эрх:
"Улс төрийн тойм" сонин