Орос бараа чанартай, хятадынх муу гэсэн ойлголт байдаг. Гэсэн ч хятадад үйлдвэрлэсэн бараа, бүтээгдэхүүнийг хэрэглэдэггүй хүн гэж бараг байдаггүй. Угаасаа үнэ дагаж чанар гэдэг болохоор оросын гэсэн болгоны үнэ дийлдэнэ гэж байхгүй. Харин урд хөршийнх хямд учраас бид байнга авдаг. Гэхдээ нас нь богино. Гэрлийн шил л гэхэд хэдхэн хоноод шатчихна. Дахиад л авна. Харамч хүн илүү төлдөг гэдэгтэй л адил юм уу даа. Урд хөршийнхөн ч ухаантай юм аа. Аливаа зүйлийг богино настай хийж, хямд үнээр зарах тусам илүү ашиг олдог аж. Ер нь тийм байлаа гээд яах вэ дээ. Хүн халаасныхаа хэмжээнд л хэрэглээгээ тааруулна шүү дээ. Харин үүнтэй тун төстэй нэг сонин ойлголт сүүлийн үед бий болсон байна.Ямар ч ажлыг чанаргүй гүйцэтгэж байх ёстой гэнэ. Тэгэх тусмаа ашигтай байдаг аж. Жишээ нь, улсын төсвөөс 500 гаруй сая төгрөг зарцуулан байж Багшийн дээдийн урд нүхэн гарц барьсан. Уг ажлыг “Хотын зам” компани гүйцэтгэснийг санаж байна. Гэтэл өнөөх нь жил ч хүрэлгүй суулт өгөөд юу юугүй нурж мэдэхээр болжээ. Хэрэв нураад унавал нөгөө компани нь дахиад л барих байлгүй. Хотын төвийн зассан замууд ч ялгаагүй. Ганц борооноор л хагарч цоордог. Энэ нь чанаргүй ажил хийсэн ч тухайн компанид хариуцлага тооцдоггүй, дахин тендерт оролцуулдаг төр засгийн өгөөмөр сэтгэлтэй холбоотой байх. Хүний хамгийн хэрэгтэй зүйл болох үл хөдлөх хөрөнгө орон сууцыг ч ердөө л хөөсөөр барьж байгаа. Тэгэхээр бараа бүтээгдэхүүн чанаргүй байх тусмаа ашигтай байдаг гэсэн “зарчим” дэд бүтэц, бүтээн байгуулалтын салбарт ч хүчтэй үйлчилж байгаа бололтой. Буруу нь юу байх вэ. Өдөр бүр замаа засч, барилга барьж байвал гоё юм биш үү. Ядаж л монголчууд хөдөлмөрч харагдана шүү дээ.
Ч.ДЭШДЭЛЭГ
Зохиогчийн эрх:
"Улс төрийн тойм" сонин
