“Хүний хөгжлийн сан”-гаас их, дээд сургуульд суралцагчдын сургалтын төлбөрийг олгох болсонтой холбогдуулан Монгол Улсын Ерөнхий сайд С.Батболд өчигдөр сэтгүүлчдэд мэдээлэл хийлээ.  Энэхүү мэдээллийг хийхэд Боловсрол, соёл, шинжлэх ухааны сайд Ё.Отгонбаяр мөн байлцсан юм. Монгол Улсын Ерөнхий сайд С.Батболд “Би саяхан орон нутгаар явж олон асуудал судалж ирсэн. Тэдгээрийн дотор онцгой яригдсан томоохон асуудлын нэгд сургалтын төлбөр орсон.  Хичээлийн шинэ жил эхэлж байгаатай холбогдуулаад сургалтын төлбөрийн асуудал эцэг, эхчүүдийн анхаарлын төвд байна. Сургалтын төлбөрийг Засгийн газрын хуралдаанаар шийдвэрлэсний дагуу Ё.Отгонбаяр сайдад үүрэг өгсөн. Төрийн өмчийн болоод хувийн хэвшлийн их, дээд сургууль, коллежиуд 2010-2011 оны хилчээлийн жилийн сургалтын төлбөрөө есдүгээр сарын 1-нээс арванхоёрдугаар сарын 31-н хүртэлх хугацаагаар бодож авах ёстой.  Шинэ он гаруут  Хүний хөгжил сангийн хуулийн хүрээнд иргэн бүрт олгогдох нэг сая төгрөгөөс сургалтын төлбөрт тодорхой хувийг оруулах асуудлыг бид шийдэх юм.  Ингэхдээ зохих хууль дүрэмд өөрчлөлт оруулж, ирэх оны төсөвт суулгана. Үүнийг ажил хэрэг болгоно. Энэ үүрэг даалгаврыг Сангийн сайд С.Баярцогт, Боловсрол, соёл, шинжлэх ухааны сайд сайд Ё.Отгонбаяр нарт даалгасан.
Иргэд хичээлийн хэрэглэл, сургал­тын мате­риалын үнэ ханшийг ихээр хөөрөгдөж байна гэж ярьж байгаа. Бизнес эрхлэгчид хичээлийн хэрэглэл, сургалтын материалын  үнийг үндэс­лэлгүйгээр нэмж байгаа нь зохисгүй.  Үүн дээр анхаарал тавьж, зохих арга хэмжээг авах ёстой. Орон нутагт ажиллаж байхад тавьсан бас нэг шаардлага нь ажлын байрны асуудал. Иргэдээ ажлын байраар хангах боломж, нөхцөл бүрдэж эхэлж байна. Томоохон ордуудыг эдийн засгийн эргэлтэд оруулж, шинэ бүтээн байгуулалтын төслүүд хэрэгжих үед шаардлага хангасан нарийн мэргэжлийн боловсон хүчин хэрэгтэй болно. Тиймээс энэ ажлыг  шуурхай зохион байгуулах үүрэг даалгавар өгөгдсөн. Тухайлбал, 3300 хүнийг  Оюутолгой төслийн хүрээнд сургалтад хамруулна. Иргэдээ мэргэшүүлж, бүтээн байгуулалтад оролцуулах ажлыг хугацаа алдахгүй хийх хэрэгтэй юм. Энэ ажлыг зохион байгуулахдаа  аймаг орон нутаг, сум дүүргээр нь квотлон хэрэгжүүлнэ.
Засгийн газраас  инфляцийн төвшинг барихыг хичээж байгаа ч дунджаар 13 хувьд хүрэх хандлага байна. Тиймээс их, дээд сургуулиудын сургалтын төлбөрийг  инфляцийн  төвшингээс дээш гаргахгүй байх. Ялангуяа тө­рийн өмчийн их, дээд сургуулиудын сургалтын төлбөрт түлхүү анхаарал тавьж, судалж үзэх хэрэгтэй бай­на. Их, дээд сур­гуулиудын сургалтын төлбөрийн нэмэг­дэл ямар үндэслэлээр тавигдсаныг шалгаж, сургалтын төлбөрийг зохих түвшинд барих үүрэг даалгавар өгч байна” гэлээ.
Боловсрол, соёл шинжлэх ухааны сайд Ё.Отгонбаяр “Бид их, дээд сур­гуу­лиудад албан ёсоор мэдэгдэл хүргүүлж эхэлсэн. Төрийн өмчийн их, дээд сургуулиудад энэ мэдэгдэл очсон”.
Яамны төвшинд ажлын хэсэг байгуулагдсан, ажиллаж байна. Их, дээд сургуулиуд төлбөрийн ханшаа бүгд ирүүлж амжаагүй байна. Бид Үндэсний статистикийн газраас оны инфляцийн дундаж төвшинг албан ёсоор гаргасан. Энэ төвшингээс дээш нэмэхгүй байх, төлбөрөө нэмсэн сургуулиуд үн­дэслэлтэй тайлбар өгөх, үндэслэлгүйгээр инфляцийн төвшнөөс илүү гаргаж төлбөрөө нэмсэн  сургуулиудад хариуцлага тооцох арга хэмжээ авна гэдгээ мэдэгдсэн. Ерөнхий боловсролын дунд сур­гуулийн хувьд сурах бичгүүд өнгөрсөн оны үнээр сурагчдын гарт хүргэнэ. Хэвлэлийн компаниудад  сурах бичгийн үнийг өнгөрсөн оныхоос өсгөхгүй байх ёстой гэдэг мэдээллийг хүргүүлсэн.  Харин Оюутолгой төсөлд ажиллах 3300 хүнийг Мэргэжлийн сургалт үйлд­вэрлэлийн төвүүдэд сургахдаа Ерөн­хий сайдаас өгсөн чиглэлийг баримталж, “Оюу толгой” ХХК-тай хам­тарч ажиллана.  Монгол Улсын Ерөн­хий сайдыг орон нутагт ажиллахад ажлын байрны асуудал, мэргэжилтэй ажилтан бэлтгэх тухай асуудал ихээр  хөндөгдсөн. Гэхдээ нэг зүйлийг ойлгох хэрэгтэй, хүн бүр энэ төсөлд хамрагдана гэж ойлгож болохгүй. Бид сурлагын байдал, ажилд хичээнгүй  чанар зэргээр нь иргэдээс шалгалт авна. Үүнээс гадна уул уурхайн үндэсний зөвлөлийн шугамаар бэлтгэгдсэн хүмүүсээ бусад компаниудад ажилд орохыг санал болгож байна. Нийслэлийн дүүргүүдэд энэ ондоо багтааж элсэлт авна” гэлээ.  

Г.ДАРЬ