Япончууд Хятад улс эдийн засгийн хувьд хүчирхэг болж байгааг олон байдлаар мэдэрч байна. Зарцуулалтын чадвар нь харьцангуй буурч байх үед тэдний хөрш нь хүчирхэгжиж, хоёр орны хоорондох харилцаанд өөрчлөлт оруулж байна гэж “Bloomberg” агентлаг мэдээлж байна. Жишээ нь Японы бизнесүүд худалдан авагч биш харин худалдагч болж, дэлгүүрүүдэд мөнгөө зарцуулахаар дундад улсаас ирсэн чинээлэг жуулчдад зориулж Хятад худалдагч нартай болоод байна.

Визний шаардлага суларсантай холбоотойгоор сүүлийн хэдэн жилийн дотор Хятадаас Японд ирдэг жуулчдын тоо 80 хувь өсөөд байгаа бөгөөд энэ нь дотоодоосоо хангалттай эрэлт олж чадахгүй байгаа Японы их дэлгүүрүүд, тансаг хэрэглэлийн дэлгүүрүүдийн борлуулалтанд сайнаар нөлөөлж байна. Үүнтэй холбоотойгоор Японы зарим жижиглэнгийн дэлгүүрүүд Хятад хэлтэй үйлчлүүлэгчтэй хэрхэн харилцах тухай гарын авлага ажилтнууддаа түгээгээд байна.

2009 оны арван хоёрдугаар сард Токиод байрладаг хувцасны компани “Melrose Corporation” Хятад хэлтэй үйлчлүүлэгч ихтэй болсонтой холбоотойгоор ажилтнууддаа Хятад хэлний гарын авлага гаргажээ. “Манай олон дэлгүүрт Хятад хэлтэй үйлчлүүлэгч өдөр тутам олноороо ирдгийг бид мэдсэн” гэж тус компанийн хэвлэлийн төлөөлөгч Киоко Огасавара ярьж байна.

Парис, Милан, Нью-Йоркруу барууны тансаг бараа бүтээгдэхүүн худалдан авахаар Японы хэрэглэгчид онгоц дүүргэн нисэж очдог байсан бол одоо Хятадын дэлгүүр хэсэгчид Японы дизайнеруудын бүтээгдэхүүнийг авахаар ирдэг болоод байна. Түүнчлэн түргэн хоол, цэвэрлэгээ, жижиг дэлгүүрүүд зэрэг үйлчилгээний салбарт ажилладаг Хятад ажилчдын тоо нэмэгдсэн байна. 1980-аад оны үед, Японы эдийн засаг хүчтэй тэлж байх үед төрсөн үеийнхэн одоо эцэг эхийнхээ мөнгөөр амьдарч, өөрсдөө биеийн хүчний ажил хийхээс зайлсхийх нь олонтаа. Тиймээс Японоор сайн ярьж чадахгүй эдгээр гадны ажилчдыг заримдаа Японы үе тэнгийнхнээс нь илүү үнэлэх тохиолдол цөөн биш гэнэ. “Миний очдог нэгэн хувцас угаалгын газар нэг Хятад охин байдаг. Тэр Японоор 100 хувь ярьж чаддаггүй ч дандаа эелдэг харьцаг. Энэ нь надтай хамт ресторанд ажилладаг ч тэнд ажиллах дургүй нь бараг царайн дээрээс нь илт мэдэгддэг Япон залуучуудаас өгт өөр” гэж рестораны бизнес эрхэлдэг гүйцэтгэх захирал Хироши Умезава ярьж байна.

Т.Бадрах