Дэлхийд алдартай Sims цуврал тоглоомын гуравдугаар анги персонал компьютер дээр гараад удаагүй байгаа. Тэгвэл нэн удахгүй буюу 2010 оны аравдугаар сарын 26-нд гэрийн консол хэмээгддэг PlayStation 3, Xbox 360, Wii болон Nintendo DS дээр тоглоход зориулан худалдаанд гаргах юм. Зарим эх сурвалжууд 3D дээр хүртэл хийгдэж буй хэмээж байгаа ч хэзээнээс эхлэн зах зээлд гарах нь тодорхойгүй байгаа.
Simulation төрлийн тус цуврал тоглоомыг АНУ-ын видео тоглоомын зах зээлийн магнат хэмээгддэг “Electronic Arts”-ын салбар компани болох Maxis-аас бүтээн гаргадаг. Цувралын эхний хоёр анги бүх цаг үеийн түүхэнд хамгийн их хувь борлогдсон тоглоомонд тооцогддог бол гуравдугаар анги нь ч борлуулалтад гарсан эхний долоо хоногтоо л 1.4 сая хувь зарагдаж бүтэн сарын турш АНУ-д хамгийн ашиг орлого бүхий тоглоомын жагсаалтыг тэргүүлж байсан юм.
Ийнхүү Sims цуврал өргөжин хүрээгээ тэлсээр байна.

Н.Наран