“Сингапур-2010”-ын нээлтийн ёслол наймдугаар сарын 14 буюу Монголын спортын түүхэнд анхны олимпийн аварга төрсний хоёр жилийн ойн өдөртэй яг давхцав. Одоогоос хоёр жилийн өмнө “Бээжин-2008”-д жүдоч Н.Түвшинбаяр тав давж, олимпийн аварга гэдэг эрхэм цолыг хүртэж байсан бол жүдогийн тамирчин О.Дөлгөөн (66 кг) ганцаараа эрх хүртэж, 17 өрсөлдөгчтэй жинд хүч үзэхээр дасгалжуулагч Д.Энхбаатарын хамт бэлтгэлээ базаан байнам. Харин боксын аваргын шийрийг хатаахаар залуу зодоонч Д.Ананд нударгаа зангидан, зоригоо хурцлан буй бөгөөд түүний жинд зургаан боксчин буй.

Өвөөгийн ажил ундарсаар

ОУОХ-ны хүндэт гишүүн Ш.Магван өчигдөр (VIII.15) олимпийн тосгонд зочилж, өсвөрийн тамирчидтайгаа уулзан цаашдын тэмцээнд нь амжилт хүссэн юм. Олимпизмийн үзэл санааг түгээн дэлгэрүүлэх үйлсэд бүхнээ зориулсан тэрбээр олон арга хэмжээнд уригдан оролцож, амрах завгүй ажиллаж байна. Уржигдар тав, өчигдөр дөрвөн том ёслолд оролцжээ. Олимпийн цэнгэлдэхийн хойморт тугаа намируулан орж ирсэн тамирчдадаа биечлэн баяр хүргэх хүндтэй үүрэг түүнд оногдсон билээ.

Ганц дайчин ганцаардахгүй

“Сингапур-2010” олимпийн наадмыг сурвалжлахаар Монголоос телевизийн ганцхан сэтгүүлч ирсэн нь ТВ5 телевизийн Болормаа юм. Ганц дайчин ганцаардахгүй гэгчийн үлгэрийг харуулахаар ирсэн тэрбээр урьд нь өвөл, зуны олимпийн наадмыг халуун цэгээс нь дамжуулсан арвин туршлагатай нэгэн билээ. Маргаашнаас манай тамирчдын тэмцээний гараа эхэлж, телевизийн цэнхэр дэлгэцээр цацагдах бөгөөд энэ хүндтэй үүргийг хүлээсэндээ Болороо баяртай байгаа гэнэ.

Бамбар буухиалсан монгол хүүхдүүд

Сингапурт хөшгөө нээсэн Дэлхийн хүүхдийн анхдугаар олимпийн наадмын бамбарыг Сөүл хотод хүлээн авах ёслол наймдугаар сарын 4-нд болоход Монгол Улсыг төлөөлж Жаргалсайханы Гантогтох, Нямдаваагийн Сараа нар оролцлоо. 20 орчим орны хүүхдүүд энэхүү арга хэмжээнд оролцсон бөгөөд БНСУ-ын ҮОХ-ны ерөнхийлөгч, Сөүл хотын орлогч дарга, “Сингапур-2010” Хүүхдийн анхдугаар олимпийн наадмыг ЗБХ-ны дарга нар баяр хүргэж, үг хэлсэн байна. Энэ үеэр Сингапур, БНСУ-ын хамтарсан урлагийн тоглолт мөн болсон юм.