Монгол орны аюулгүй байдал, эдийн засгийн тэнцвэртэй хөгжил, байгалийн
баялгийн ашиг­лалт, хамгаалалтын асуудалд Ерөнхийлөгч Ц.Элбэгдорж
ан­хаарлаа хандуулсан. Тэрбээр ашигт малтмалын лиценз, хайгуулын тусгай
зөвшөөрлийг шилжүүлэх, шинээр олгох бо­лон да­хин олгох асуудлыг
өнгөрсөн дө­рөвдүгээр сарын 20-ны өдрөөс түр зогсоосон билээ. Харин
тусгай зөвшөөрлийг олгохыг хо­риглосонтой холбогдуулан хэчнээн компанийн
лицензийг түдгэлзүүлсэн талаар Ашигт малт­малын газрын Геологи, уул
уур­хайн кадастрын хэлтсийн статистикийн тасгийн дарга Х.Бат­баатараас
тодрууллаа.

-Ерөнхийлөгч ашигт малт­малын хайгуулын тусгай зөвшөөр­лийг
түдгэлзүүлэхээс өмнө хайгуулын хэчнээн тусгай зөвшөөрөл олгосон байв?

-Ашигт малтмалын тусгай зөвшөөрлийг зогсоосонтой холбог­дуулан өнгөрсөн
дөрөвдүгээр сарын 30-ны өдөр Үндэсний аюулгүй байд­лын зөвлөлөөс зөвхөн
хайгуулын тусгай зөвшөөрөл хүссэн өргөдлийг шинээр авах, олгох үйл
ажиллагааг зогсоосон. Харин бусад үйл ажил­лагаагаа хэвийн явуулж
байгаа. Ашиглалтын лицензийн тухай  өргөдлийг хү­лээн авах, олгох,
шилжүүлэх, барь­цаалах, сунгах гэх мэт асуудлыг нээлт­тэй болгосон.
Тухайн үед буюу дөрөвдүгээр сарын 20-нд Монгол Улсын нутаг дэвсгэрийн
24.7 хувьд нь хайгуулын болон ашиг­лалтын тусгай зөвшөөрөл олго­сон
байсан. Үүнийг тоогоор авч үзвэл, 4762 тусгай зөвшөөрөл хүчин төгөлдөр
бүрт­гэгд­сэн байсан юм. Үүнээс 1105 нь ашиг­лалтын тусгай зөвшөөрөл.
Энэ нь Монгол Улсын ну­таг дэвсгэрийн 0.3 хувийг эзэлж бай­на. Харин
3657 хайгуулын тус­­гай зөвшөөрөл байсан.

-Тусгай зөвшөөрлийг хо­ригло­сонтой холбог­дуулан хэчнээн байгууллага, аж ахуйн нэгжийн тусгай зөвшөөрлийг  түдгэлзүү­лсэн бэ?

-Хайгуулын тусгай зөвшөөрөл ол­­гохыг хориглос­ноос хойш ашиг­лалтын
тусгай зөвшөө­рөл авах нь ихэссэн. Ер нь байгууллага, аж ахуйн нэгжүүд
хайгуулын тусгай зөвшөөрлөө ашиглах тал дээ­р түлхүү ажиллаж байна.
Өнөөдрийн байдлаар, манай улсын нутаг дэвсгэрт хүчин төгөлдөр 4320
тусгай зөвшөөрөл байдаг. Өнгөрсөн дө­рөвдүгээр сарын 20-ны байдлаар 1105
ашиглалтын тусгай зөвшөөрөл бай­сан бол 1116 тусгай зөвшөөрөл болж
өссөн. Өнөөдрийн байдлаар, хайгуулын тусгай зөвшөөрөл 3205 байна.
Хайгуулын тусгай зөвшөөрөл ол­гохыг зогсоосонтой холбогдуулан манай
газар хүчин төгөлдөр байгаа тусгай зөвшөөрлөө бууруулах тал дээр нэлээд
ажиллаж байна. Тусгай зөвшөөрлийн ху­раамжаа хугацаанд нь төлөөгүй,
хайгуулын ажилд то­дорхой хэмжээгээр зарцуулах зард­лын доод хэмжээг
хангаж байгаа эсэх зэргийг хянан ажиллаж байгаа юм. Өнөөдрийн байдлаар,
452 хайгуулын тусгай зөвшөөрлийг цуцалсан.

-Хориг тавьсаны дараа хайгуулын тусгай зөвшөөрөл хэдэн хувиар буурав?

-Урьд нь 24.7 хувьд хайгуулын болон ашиглалтын тусгай зөвшөө­рөлтэй
байсан бол одоо 17.8 хувьд нь тусгай зөвшөөрөл эзэмшиж байна. Үүнээс
харахад нэлээд буур­сан байгаа юм. Үүнээс 17.5 хувь хайгуулын тусгай
зөвшөөрөл. Хэ­дийгээр тусгай зөвшөөрлийн тоо ба­гасахад давхар талбайн
хэмжээ асар их багасч байгаа нь сайн боловч улсад орж байгаа орлого
багасах төлөвтэй байна.

Зохиогчийн эрх:
"Улс төрийн тойм" сонин