УИХ-ын эрхэм гишүүдийн ихэнх нь битүүний өдрийн хуралдаандаа дээлтэй ирцгээжээ. Дийлэнх нь дан эмжээртэй цайвар саарал, цайвар шаргал ноолууран дээлээр гоёсон нь энэ цагаан сарын гоёлын өнгийг тодорхойлов бололтой. Гарч байгаа төмөр цагаагчин туулай жилээ бодож ингэж цайвар дээлээр гоёж байгаа байх гэсэн яриа Төрийн ордонд дуулдаж байна.

Харин цагаан дээлтэй гишүүд бараандуу хуулиуд төрүүлж мэдэхээр болов. Өглөөний хуралдаанаар Жендэрийн тэгш байдлын хуулиас эмэгтэйчүүдийн сонгуулийн квот, эх, эцгээ алдсан хүүхдүүдийн тэтгэмж, бүсгүйчүүдийг хүчээр үр хөндүүлэхэд хүргэсэн этгээдэд хүлээлгэх хариуцлага зэргийг хасч байгаад баталсан бол одоо Эрүүгийн хуульд нэмэлт оруулах тухай ярьж эхлэв. Түүгээр төр, засгийн эсрэг тэмцэл өрнүүлэгсдэд хуулийн хариуцлага ногдуулах талаар ярилцаж байгаа юм.