Арван жилийн хүүхдүүд сам­барын урд зогсох багшийн заа­сан хичээлийг төдийлөн анхаа­рал­гүйгээр шуугилддаг даа. Тэгээд багш самбарт гарч асуугаад эхлэ­хээр чив чимээгүй болдогсон. Жаа­хан туршлага муутай багшийн яриаг бол бүр анхаарах ч үгүй. Яг л ийм дүр зураг нийслэлийн удир­дах ажилтнуудын шуурхай зөв­лөгөөнөөс ажиглагдана.
Хотын дарга цаг үеийн байдлын талаар мэдээлэл хийж байхад хур­лын танхимын ард хэсэгт амралтаа хэр­хэн өнгөрөөсөн талаар, өчигдөр хаана, яаж архи ууж, дараа нь хэн, хэн хөглөсөн” талаар чимээтэйхэн шиг ярина. Гэтэл урд нь хотын дарга өвөлжилтийн бэлтгэлийн талаар яриад байгаа юм шүү дээ, уг нь. Ерөөс энэ хурал дээр утсаараа оролдоогүй хүн гэж алга. Хотын ногоон бүсийн талаар илтгэл өрнөж байхад хотын даргаасаа ава­хуу­лаад бүх хүмүүс утсаа орол­доостой. Гэтэл тэнд илтгэл тавьж байгаа хүн нь ногоон бүсийн өнөө­гийн байдлын талаар тайлан яриад байгаа юм. Өвөлжилтийн бэлт­гэл, хотын удирдах албан тушаалт­нуудын хувьд чухал асуудал биш бололтой. Илтгэл тавих хүний  яриа ч дуусч хотын дарга “Санал хүсэлт, ажлын санал байвал одоо хэлчих” гэхэд дөнгөж сая шуугилдаж байсан хүмүүс чив чимээгүй, ялаа нисэх нь сонсогдохоор тийм нам гүм байдал ноёлов. Өвөлжилтийн бэлтгэлийн талаар хоёр дахь хэсэг эхэлж байна. Хуралд суусан хүмүү­сээс анхааруул хандуулж байгаа шинж огтхон ч алга. Танхим чимээ шуугианаар их. Хурлын арын хэ­сэгт суусан хотын нэгэн удирдах ажилтны яриаг одоо та бүхэнд сийрүүлэе.
“За, хөгшөөн нөгөө шахмал түлш­нийхээ уутнаас даруйхан шиг ол­ныг надад өгөх хэрэгтэй байна. Тэ­гээд уутандаа гадных гэмээр хая­гийг хадаарай даа. Савлахдаа эхлээд арван килограммаар савлаж бай­гаад, дараа нь тав, таваар нь сав­лана шүү. Хэрвээ энэ ажлыг л сайн хийгээд авбал чи энэ өвлийн шахмал түлшний тендерт ялсан гэж мэд” гэх нь тэр. Агаарын бохирд­лыг бууруулахад чухал ач хол­богдолтой гээд байдаг мөнөөх шах­мал түлшийг үнэндээ ийм учраас л иргэдэд нийлүүлдэг аж. Зэвүү хүрмээр байгаа биз. Энэ эрхмийн яриаг сэм сонссон болохоор энэ удаад нууцлав. Хожим түлшний тендерийг зарлах цагаар хөрөг зурагтай нь танилцуулах болно.
Нас биед хүрсэн, тэгээд хотыг авч яваа  хотын удирдах албан тушаалт­нууд яг л томоогүй сурагч шиг аяглах нь харамсалтай. Нийс­лэлийн байгаль орчны газрын төлөө­лөл илтгэлээ тавьж байхад “Үхэж байсан дуутай шаар вэ, ямар амь­тан байдаг бол харах юмсан” эсвэл “Энэ хүүхэн чинь харин хөөр­хөн дамшиг уу, үгүй юу” гээд ирмэж байх жишээтэй. Нөгөө л хажууд сууж байгаа “хурган” даргын утас дуугарлаа. “За чиний асуудлыг яг шийдэх гээд явж байна. Хөрөнгө нь гарч өгдөггүй ээ. Болохгүй бол сууриа шууд цутгачих, тэр хүмүүсийн уурлах ч яах вэ. Наана чинь Г.Мөнхбаяр дарга намайг хурдал гээд шахаад байна. Би маргааш 5 сая төгрөг гаргуулаад өгье, аргалаад өнөө­дөр олчих…” нэг иймэрхүү учир битүүлэг яриа, хуралдааны танхи­мын арын хэсгээр их. Хурлыг удир­даж явуулж байгаа хүний яриа цэгцтэй ядахдаа өмнө бэлдчихсэн баймаар. Гэтэл хотын даргын ярьж байгаа асуудлыг хотын менежер нь засч өгөөд сууж байх юм. Таны ярьж байгаа асуудал чинь энэ гээд хэлэхээр, хотын дарга нь тийм гээд дэмжиж байх. Дугуй ширээний ард суусан, тэдний ард суусан хүмүүс огт зүгээр суусангүй. Ийш тийшээ хөдөлж, сандал руу өшгилж, нэг, нэгнээ шоголж сууж байх юм. Баахан ингэж байснаа “Сая Г.Мөнхбаяр дарга юу хэлээд орхив. Хэлээд өгөөч” гэх жишээтэй.
Сард хоёрхон удаа хуралдаж хотын тулгамдсан асуудлыг ший­дэх шуурхай зөвлөгөөнийг үр бү­тээл­тэй өнгөрөөхгүй гэхэд адаг­лаад тэрхэн хугацаанд утсаа унт­­раачих соёлд сураагүй аж, хо­тын удирдлагууд. Тэгсэн хэрнээ хэв­­лэлийнхнийг хармагцаа төрөл арилжсан мэт болно. Мөнөөх гу­дам­жины үг хэллэг, “хор” зэргээсээ огт өөрийг ярина. Хотоо гэх хоёр­гүй сэтгэлээр зүтгэж яваа хүмүүс болж хувирна. Туслахынхаа өг­сөн цаасыг бариад телевизийн ка­­ме­рийн өмнө бурж өгөх тийм л дүр зураг ажиглагдлаа. Хурлын ихэнх цагийг “арзагнаж, маазарч” өнгөрөөсөн хүмүүс Улаанбаатар хотын тулгамдсан асуудлын талаар олигтой үг хэлж таарах уу? Энэ хүмүүс чинь уг нь хотын хувь заяаг шийддэг хүмүүс юмсан. Тагнуулын ерөнхий газрынхан талцаад биесээ муулахын оронд энэ хурлыг тагнаад нэг үзвэл яасан юм бэ. Авлигатэй тэмцэх газрын дарга ажилтнуудаа тагнаж, чагнахын оронд тэдний утсыг сонсвол илүү ажил хийсэн болж, үр дүн нь ч өдөртөө гарах вий. Дараагийн хурал 16-нд болно.
Б. Сүх