Испанийн Барселонад хөнгөн атлетикийн Европын аварга шалгаруулах тэмцээн үргэлжилж байна. Тэмцээний хоёр дахь өдөр хамгийн сонирхолтой уралдаан эрэгтэйчүүдийн 100 метрт боллоо. Энэ зайн шилдэг Британийн Двэйн Чамберс дөнгөж тавдугаар байрт, өнгөрсөн жилийн Европын аварга Португалийн Фрэнсис Обиквэлу дөрөвдүгээр байрт орсноор медалийн тавцангийн байр шинэ эздийг угтаж авсан юм. Францын 20 настай залуу тамирчин Кристофф Лимэйтр 10,11 секундэд 100 метрийн зайг туулж, том тэмцээний анхны алтан медалиа авсан бол Британийн Марк Льюис-Фрэнсис 10,18-аар мөнгө, түүнтэй адил цагийн амжилттай Францын Мартиал Мбанжок хүрэл медалийн эзэн болсон байна.
Эмэгтэйчүүдийн зээрэнцэг шидэлтийн төрөлд Хорватын анхны алтан медалийг Сандра Перкович авчирлаа. Европын залуучуудын аварга 20 настай тамирчин 64,67 метрийн амжилтаар мөн л том тэмцээний анхны алтаа зүүсэн байна. Румыний Николете Грасу, Польшийн Жоана Вишневски нар медалийн тавцанг бүрдүүлжээ.
Харин Эмэгтэйчүүдийн уртын харайлтын төрөлд Латвийн Инета Радевича аваргалсан байна. Тэрбээр Португалийн Найде Гомиштай адил 6,92 метр хол харайсан ч хоёр дахь оролдлогоороо энэ амжилтыг үзүүлсэн учраас Латвид анхны алт медаль нь иржээ. Хүрлийг Оросын Ольга Кучеренко авсан байна.
Эмэгтэйчүүдийн 10 мянган метрийн уралдаанд Турк улс мөн л анхны алтан медалиа авсан байна. Олимпийн мөнгөн медальт Элван Абейлегесэ 31 мин 10,23 секунд амжилтаар түрүүлж, Европын аварга Оросын Инга Абитова мөнгө, Португалийн Жэссика Аугусто хүрлийн эзэн болсон байна.
Одоогийн байдлаар ОХУ-ын баг хоёр алт, хоёр мөнгө, гурван хүрэл, нийт долоон медальтай Европын аваргыг тэргүүлж байна. Их Британи, Беларусь, Францын багууд удаахь байрт бичигдэж байна.
Score Studio