Ирэх жил Tour de France-ын дөрөв дэх цомын төлөө өрсөлдөх Альберто Контадор буурь сэлгэхээр шийдэж, Astana багийн удирдлагаас тавьсан шинэ гэрээний саналд татгалзсан хариу өгчээ. Испанийн дугуйчин тэрбээр өчигдөр албан ёсоор мэдэгдэл хийсэн бөгөөд мэргэжлийн дугуйн спортын элитүүдийн уралдаанд түрүүлснээсээ хойш ердөө гуравхан хоногийн дараа дээрх шийдвэрийг гаргаж байгаа юм.

Өдгөө 27 настай Контадор Казахстаны Astana багт 2008 онд нэгдсэн юм. Тэрбээр 2007 онд Discovery Channel багийн нэр дээр уралдаж, Tour de France уралдаанаас анхны түрүүгээ авсан боловч дараа жил нь Astana баг допингийн асуудалд орооцолдсон учир тэмцээнд оролцох эрхээ хасуулснаар Контадор аваргаа хамгаалах боломжгүй болсон билээ. Харин өнгөрсөн жил тэрбээр амжилттай уралдаж, хоёр дахиа түрүүлсэн бөгөөд энэ жилийн уралдаанд ч гол өрсөлдөгчийн эгнээнд багтсаар аваргалсан юм.

Түүнийг ирэх улиралд аль багийн төлөө хүчин зүтгэх тухайгаа шийдээгүй байгаа талаар хэвлэлийн төлөөлөгч нь мэдэгджээ.

С.Цэлмэг