Өнгөрсөн нэг жилийн хугацаанд до­тоо­дын хоёр ч банкны үйл ажиллагаа догол­дож арилжааны банкуудын жагсаалтаас хасагдлаа. Мөн зарим банк нэгдэж арил­жааны банкуудад багагүй өөрчлөлт ор­лоо. Дампуурлаа анх түрүүн зарласан нь  до­тоодын хөрөнгө оруулалттай “Анод” банк байсан би­лээ. Харин дараачийх нь “Зоос”, одоо түүнийг Төрийн банк хэмээн нэрлэх болсон. Эдгээр банкны дампуурлыг олон янзаар тайлбарлаж, улс төр эдийн засгийн янз бүрийн хүчин зүйлтэй холбож ярих хүмүүс байдаг. Юутай ч энэ заргыг хөөлгүй, иргэдийн хадгаламжийг хэрхэн зохицуулж байгаад анхаарлаа хандуулъя. Өнгөрсөн долоо хоногт Монголбанкны сард нэг удаа хийдэг хэвлэлийн бага хурал болов. Энэ үеэр “Анод” банкны эрх хүлээн авагч тендер зарлаж шалгаруулснаар хадгаламж эзэмшигчдийг “Хадгаламж” банк руу шилжүүлснийг дуулгасныг иш болгон тус банкийг зорилоо.

Төв шуудангийн хойно, хуучин “Монгол шуудан” банкны саарал байшинг шар өнгөөр будаж, улаан хүрээ татаж “Хадгаламж” банкны Төв болгожээ. Харин Монголбанкны залгаа байрлах Хадгаламж банкийг Төв салбар хэмээн нэрлэжээ. Эдгээр газруудад “Анод” банкны хадгаламж эзэмшигчидтэй холбоотой асуудлыг шийдвэрлэж буй ажээ.

Тус төв хоёр үйлчилгээний танхимтай ба оронгуут хана даган суух теллерүүдийн тав дахь теллер “Анод”-ын хадгаламж эзэмшигч­дийг ерөнхийд нь хариуцаж үйлчилдэг. Түү­нийг Цэцэгжаргал гэх ба тэрбээр “Анод” бан­кинд зургаан жил хүүхдийн хадгаламж эзэмшсэн харилцагчид үйлчилж байлаа. Үйлчлүүлэгчтэй уулзаж санаа бодлыг нь сонсоход, “Анх “Анод”-ын байдал эвгүйтээд л дампуурлаа, найдваргүй зээлдэгч нараас боллоо гэх мэдээллүүдийг сонсч, үйл ажил­лагаа нь үргэлжлэх боломжгүйд хүрэхэд айж сандарч цочирдоогүй. Төрөөс арилжааны банкуудыг дампуурсан тохиолдолд хохирлыг нь бүрэн даана гэсэн ойлголттой байсан юм. Тиймдээ ч асуудлыг яаж шийдвэрлэхийг нь хүлээж өнөөдрийг хүрлээ. “Анод”-д мөнгөө хадгалуулсан иргэд “Хадгаламж” банктай харилцах тухай дуулаад энд ирж байна” гэсэн юм.

Иргэний үнэмлэх, хадгаламжийн дэвтэр гэх бичиг баримтууд бүрэн байвал  үйлчилгээ үзүүлэхэд цааргалах зүйлгүй аж. Надтай хуучилсан  үйлчлүүлэгч хадгалуулсан мөнгөө буцааж авна гэсэн тул мөнгө гаргаж өгөх хүртэл 30 шахам минут болов. Энэ хооронд Цэцэгжаргал гурван ч удаа суудлаасаа босч, үйлчлүүлэгчийн бичиг баримтыг хуулбарлаж, тамгалуулж, дээд албан тушаалтандаа танилцуулах гэх мэтээр ажиллаж байлаа. Ихэнх теллерүүд цайндаа гарч байхад энэ теллер бусдыгаа бодвол арай илүү ачаалалтай байгаа харагдсан. Өдөрт нь дунджаар Хадгаламж банкнаас гадна “Анод”-ын үйлчлүүлэгч 5-6 хүн  ирдэг гэнэ.
Хадгаламж банкны Төв салбарын захирал Б.Цэнгэлтэй уулзаж цөөн асуултад хариулт авав.

-Танайд “Анод” банкны хэчнээн хадга­ламж эзэмшигчид ирсэн байгаа вэ?

-10 мянган хадгаламж эзэмшигчийн жагсаалт ирсэн байгаа.

-Тэдний хадгаламжийн мөнгийг олгож байгаа юу, энэ мөнгө танай банкны дансанд орж ирсэн үү?

-“Анод” банкинд хадгаламж эзэмшигчид манай банкинд шилжиж ирсэн. Хадгаламж эзэмшигчид “Хадгаламж” банкнаас банкны хүссэн үйлчилгээгээ авч болно. Хадгаламжаа үргэлжлүүлэн хадгалж болно, мөн өөрийн хэрэгцээний мөнгөө зарлагаар авч болно шүү дээ. “Анод” банкнаас 10 000 орчим хадгаламж эзэмшигчдийн мөнгө ирсэн.

-10 мянган хүний хадгаламж хэдий хэр төгрөг шилжин ирсэн бол?

-Харилцагчдын нууц учраас мөнгөн дүнгийн талаар дэлгэрэнгүй мэдээлэл өгөх боломжгүй.

-Иргэд хадгаламжаа буцаан авах нь их байна уу эсвэл үргэлжлүүлэн хадгалуулж байгаа юу?

-Банкин дахь хадгаламжид баталгаа гаргах хууль гарсан болохоор иргэд банкны талаарх мэдээллийг их тайван хүлээж авсан. Манайхаар “Анод”-ын хадгаламж эзэмшигч өдөрт хамгийн дээд тал нь 10 хүн л үйлч­лүүлдэг. Тэдний олонх нь манай банкны нөхцөлөөр хадгаламжаа үргэлжлүүлэн хадгалж байна гэсэн юм.
“Анод” банкинд хадгаламж эзэмшиж бай­сан харилцагч та хадгаламжнаасаа мөнгөө зар­­лагадаж болно, цаашид хадгаламжаа үр­гэлж­лүүлж ч бас болно. Ийм тохиолдолд Хад­галамж банкны хадгаламжийн нөхцөлөөр тэдний санал болгосон хадгаламжийн бүтээг­дэхүүнээс сонгох аж. Одоогийн байдлаар “Хадгаламж” руу шилжиж ирсэн 10 мянган хадгаламж эзэмшигчээс 200-300 орчим нь хадгаламжийн гэрээгээ шинэчлээд байна.

Түүнчлэн “Анод”-д харилцах данс эзэмшиж байсан үйлчлүүлэгчид мөн эднийхээр андуурч ирэх нь их. Энэ талаар асууж ирэгсэд ч олон гэнэ. Ихэвчлэн компаниуд харилцах данстай байдаг аж. Тэдэнд дуулгахад, “Анод”-ын төв байранд очоорой. Бичиг баримтуудаа авч очоод, харилцах дансны үлдэгдлийн тооцоог хийгээд дансаа хаалгах хэрэгтэй юм байна.

Б.БЯМБАА