Манай чөлөөт бөхийн шигшээ багийн залуу тамирчид Унгарын нийслэл Будапешт хотноо зохиогдож буй залуучуудын дэлхийн аварга шалгаруулах тэмцээнд оролцож байгаа билээ. Харин өчигдөр эрэгтэйчүүдийн 50, 60, 74 болон 96 кг-ын жингийн барилдаан болсноос манай улсаас Б.Төгс 50 кг-д, Б.Хас-Эрдэнэ 60 кг-д зодоглосон юм. Харамсалтай нь, манай хоёр бөх хоёул дагах барилдаанд ялагдсанаар тэмцээнээ дуусгасан байна.

Б.Төгс эхний тойрогт хийлж, улмаар Гватемалагийн бөх Кристиан Хосе Мокс Ариасыг 14:1 харьцаатай илт давуу ялсан боловч Гүржийн бөхөд ялагдсан юм. Манай бөхийг ялсан Гүржийн бөх Лаша Талахазе цаашид амжилттай барилдаж, аваргын төлөө барилдах эрхтэй болсон учир Б.Төгс дагах барилдаанд зодоглосон ч АНУ-ын бөхөд ялагдсанаар тэмцээнээ дуусгасан байна.

Харин 60 кг-д өрсөлдсөн Б.Хас-Эрдэнийн тухайд хэсгийн эхний тойрогт Туркменистаны тамирчин Маруд Рустамовыг ялсан бөгөөд удаахь барилдаандаа ОХУ-ын бөхөд ялагджээ. Гэхдээ манай тамирчин дагах барилдаанд зодоглох эрхтэй болж, улмаар нэг ялж, нэг ялагдсанаар тэмцээнээ дуусгажээ.

Харин өнөөдөр тэмцээний эрэгтэйчүүдийн чөлөөт бөхийн 55, 66, 84, 120 кг-ын жингийн барилдаан болох бөгөөд манай улсаас Б.Номин 55 кг-д өрсөлдөнө.

С.Цэлмэг