Мэргэжлийн сумо бөхийн 69 дэх ёкозуна Хакухо М.Даваажаргал нагоя башёгийн 13 дахь өдрийн барилдаанд зүүн жигүүрийн тэргүүн озэки Котоошюг уватэнагэ мэхээр давснаар дараалсан 45 дахь ялалтаа авч, дараалан авсан давааныхаа тоогоор домогт их аварга Тайхогийн амжилтыг давтлаа. Хэрэв их аварга маргаашийн барилдаанд өрсөлдөгчөө давбал Чиёнофүжи аваргын дараа зургадугаарт эрэмбэлэгдэх юм.

Макүүчи зиндаанд зодоглож буй манай бусад бөхчүүдийн тухайд өнөөдөр озэки Харумафүжи Д.Бямбадорж озэки Барутог окуридаши мэхээр давж, башёгийн зургаа дахь даваагаа авсан бол Какурюү М.Ананд ёрикири мэхээр Кёкүтэнхо Н.Цэвэгнямыг давснаар 10 даваатай болж байна. Мөн өнөөдөр манай сумочдоос Асасэкирюү Б.Дашням котэнагэ мэхээр Какизоэг давсан бол Моконами Г.Базарсад, Токүсэгава Б.Ганболд, Шотэнро Д.Нямсүрэн, Тамаваши Б.Мөнх-Оргил нар өвдөг шорооджээ.

С.Цэлмэг