“British Petroleum” Техас, Канад, Египет дэхь хөрөнгүүдээ зарж Мексикийн булан дахь газрын тос цэвэрлэх үйл ажиллагаагаа санхүүжүүлэх гэж байна. Тус компани АНУ-д байрладаг “Apache Corp” компанитай долоон тэрбум ам.долларын арилжаа хийх гэрээ байгуулжээ гэж “CNN” агентлаг мэдээллээ. Хөрөнгөө зарснаас олсон орлогыг газрын тосны цооног гэмтсэнээс далайд цутгасан газрын тосыг цэвэрлэхэд зарцуулах юм байна. Өчигдөр “British Petroleum” компани бөглөсөн цооногтоо дахин 24 цагийн даралтын тест хийхэд нөхцөл байдал хэвийн, тогтвортой байлаа гэж АНУ-ын уг асуудлыг хариуцсан захирагч Адмирал Тад Аллен мэдэгдсэн. Бөглөөд тав хонож байгаа цооногийн хажуугаар таван жижиг шүүрэлт ажиглагдсан ч тэдгээр нь ноцтой асуудал үүсгэхээр биш бөгөөд дөнгөж “дусаал төдий” хэмээн тэр ярьсан байна. Тэрээр АНУ-ын засгийн газар, “British Petroleum” хоёр “статик шийдэл” гэдэг аргын талаар ярилцаж байгаа бөгөөд энэ операцийн хүрээнд газрын тосны шүүрэлтийг зогсоохын тулд цооног руу шавар, цемент хольж шахах юм байна. “Apache” компанитай байгуулсан гэрээ нь Мексикийн булангийн газрын тосны осолтой холбоотойгоор хөрөнгөө зарж байгаа эхний тохиолдол гэж “British Petroleum” компанийн дарга Карл-Хенрик Сванберг ярьжээ. “BP” далайд цутгасан газрын тосыг тогтоож, цэвэрлэхийн тулд одоогийн байдлаар дөрвөн тэрбум ам.доллар зарцуулаад байгаа. Зарах гэж байгаа хөрөнгүүдэд нь Техас болон Шинэ Мексикийн зүүн өмнөд нутагт байдаг 3.1 тэрбум ам.долларын өртөгтэй үйлдвэрүүд болон Канадын баруун бүсэд байдаг 3.25 тэрбум ам.доллараар үнэлэгдсэн хийн бизнесүүд нь багтаж байна. Түүнчлэн Египетед байгаа газрын тосны хайгуул, үйлдвэрлэлийн хөрөнгүүдээ 650 сая ам.доллараар зарахаар болсон байна. Харин хэвлэл мэдээллүүдийн бичиж байгаа шиг Аляскийн “Prudhoe Bay” газрын тосны ордын хувьцаагаа “BP” “Apache”-д зараагүй байна.
“British Petroleum”-ийг Вьетнам, Пакистан дахь хөрөнгүүдээ болон болон Аргентин, Чил, Боливт үйл ажиллагаа явуулдаг “Argentine Pan American” компанид оруулсан есөн тэрбум ам.долларын хөрөнгөө зарж магадгүй гэж зарим хэвлэлийн хэрэгслүүд бичиж байна.
Т.Бадрах
