АТР-гийн дэлхийн цуврал 250-д багтдаг Шведийн нээлттэй тэмцээн өчигдөр аваргаа тодрууллаа. Шороон талбай дээр зохиогдсон тус тэмцээний шигшээд нутгийн хүү Робин Содерлинг, Испанийн Николас Альмагро нар шалгараад байсан юм. Өнгөрсөн жилийн аварга Робин Содерлингийг дэмжигчид Бастад хотын цэнгэлдэхэд дүүрэн байсан ч Испани теннисчин эхний сетэд илүүрхлээ. 12 дахь гэймд сетийн оноог авсан Альмагро харин дараагийн сетийг тааруухан эхлүүлсэн байна.

Дэлхийн чансааны №5 Содерлинг өрсөлдөгчийнхөө эсрэг брейк хийснээр 3:1 харьцаатай хошуучлах болж улмаар 6:3 харьцаатай хоёр дахь сетэд хожиж, ерөнхий харьцааг тэнцүүлсэн байна. Улмаар шийдвэрлэх гурав дахь сетэд Николас Альмагро хоёр ч удаа өрсөлдөгчийнхөө давуулалтыг авч, 6:2 харьцаатай хожсоноор нэг цаг, 57 минут үргэлжилсэн тоглолтын ялагч болж, 2010 оны анхны цомоо хүртсэн юм. Дэлхийн чансааны 20-рт эрэмбэлэгдсэн Николас Альмагро ийнхүү карьерынхаа туршид зургаа дахь тэмцээндээ түрүүлсэн нь энэ бөгөөд 72 мянган еврогийн шагналаас гадна чансаагаа 250 оноогоор ахиуллаа. Харин Шведийн Робин Содерлинг 37,9 мянган еврогийн шагнал хүртсэн байна.