Сербийн шилдэг теннисчин Новак Жокович Австралийн нээлттэй тэмцээний финалын тоглолтод Британийн номер нэг Энди Муррейг буулган авснаар тус тэмцээнд хоёр дахь удаагаа түрүүллээ. Өмнө нь 2008 онд Мелбурнд аваргын цом өргөж байсан тэрбээр энэ удаад 6-4; 6-2; 6-3 харьцаатай өрсөлдөгчөө төвөггүй хожсон байна. Харин Муррей ийнхүү гурван ч удаа “Их дуулга”-ын тэмцээний финалд хожигдож байгаа нь энэ юм.

Жокович, Муррей нар хоёулаа финалын шат хүртэл гайхалтай формтой байсан. Жокович хагас шигшээд өнгөрсөн жилийн аварга Рожер Федерерийг хожсон бол Муррей Испанийн Дэвид Феррерийг хожсон байгаа. Харин Феррер дэлхийн тэргүүн теннисчин Надалийг шөвгийн наймд буулган авсан билээ. Сонирхолтой нь, Жокович, Муррей нар сүүлийн хоёр жил гаруй хугацаанд АТР-гийн цуврал тэмцээнүүдэд хоорондоо нэг ч удаа таарч, тоглоогүй байсан юм. Түүнчлэн сүүлийн гурав гаруй жилийн хугацаанд анх удаа Надаль, эсвэл Федерергүйгээр өрнөсөн “Их дуулга”-ын финал энэ байлаа.