Үндэсний их баяр наадмын шагайн харваанд цуваа харвааны тэргүүн байрыг эзэлж, шинэ рекорд тогтоосон залуу харваач 17 настай Б.Мөнх-Эрдэнэтэй уулзаж цөөн хором ярилцав. Тэрбээр Өмнөговь аймгийн Цагаан овоо сумын Т.Идэрзориг ахлагчтай багийн тамирчин бөгөөд цуваа харваанд 20 харвахаас бүгдийг нь оносон аж. Тиймээс цааш үргэлжлүүлэн сум тависан бөгөөд тасралтгүй 43 харваж, Монгол Улсын шагайн харвааны шинэ рекорд тогтоосон аж. Сонирхуулахад, шагайн харвааны цуваа харваанд хасааг тасралтгүй оносон дээд хэмжээ 25 байжээ.-Томчуудын тэмцээнд оролцож дээд рекордыг нь эвдсэнд нь баяр хүргэе. Сэтгэгдэл ямар байна.
-Баяртай байна даа.
-Хэд дэх жилдээ Улсын баяр наадмын шагайн харваанд оролцож байгаа вэ?
-Анх удаагаа Улсынхаа наадамд оролцож байна.
-Урьд нь ямар тэмцээнд оролцож байв?
-Өмнө нь аймгийн аваргад оролцож байсан. Хоёр дох удаадаа наадамд оролцож байна.
-Хэзээнээс эхлэн шагайн харваагаар хичээллэх болсон бэ?
-Өнгөрсөн оны 12 сараас эхлэн шагайн харваж байна.
-Танай гэр бүлээс чинь шагай харвадаг хүн бий юу?
– Миний өвөө шагай харвадаг. Монгол Улсын хүндэт харваач Долгорын Дэмчиг гэдэг хүн бий.
-Шагайн харвааг анх хэн гэдэг багшаар заалгасан бэ?
-Өмнөговь аймгийн Ханхонгор сумын Нэргүйбаатарын Мөнхбаяр гэдэг хүн анх надад шагайн харвааг зааж өгсөн.
-Наадмын бэлтгэлээ хэр хийсэн бэ?
-Энэ жил 11 дүгээр ангиа төгсөж байгаа болохоор шалгалтандаа бэлтгээд л зав зай гарвал шагайн харвааны бэлтгэлээ хийж байсан даа.
-Баярлалаа сайхан наадаарай. Дараа жил амжилтаа улам ахиулахыг хүсэн ерөөе.
П.Наран
