3,417.49
Өчигдөр долдугаар сарын 1-нд амь үрэгдсэн залуусын гэгээн дурсгалд зориулан арга хэмжээ зохион байгууллаа. Амь үрэгдсэн хүмүүсийн ар гэрийнхэн 11 цагийн үед Гандантэгчинлэн хийдэд очиж, зул өргөн буян хураасан юм. Үүний дараа Үндэсний түүхийн музейн урд амь үрэгдсэн залуусын гэрэлт хөшөөг босгох шав тавих ёслол болсон. Энэхүү хөшөөг босгох газрыг хохирогчдын ар гэрийнхэн нь нэг жилийн өмнөөс хөөцөлдөж эхэлжээ. Ингээд МАХН-ын байрны урд талын цэцэрлэгт босгох санал гаргасан боловч газар нь бүтээгүйн улмаас хойшилсон аж. Харин нийслэлийн Захирагчийн ажлын албанаас хөшөө босгох газрыг зааж өгснөөр амь үрэгдсэн залуусын дурсгалын хөшөөг босохоор болжээ. Уг ажлыг Ардчилсан холбооноос зохион байгуулж байгаа аж. Тус холбооны дэд дарга Ш.Түвдэндорж шав тавих ёслолыг нээж үг хэлэхдээ “Энэ хөшөө босгох газрыг олоход их хэцүү байсан. Хамгийн гол нь төр засаг үүнд анхаарлаа хандуулах ёстой. Бид хөшөө босгох ажлыг үргэлжлүүлэхээ мэдэгдэж байна” гэсэн юм. Мөн дурсгалын хөшөө босгоход шаардлагатай санхүүгийн асуудалд туслалцаа үзүүлэхээ Ерөнхийлөгчийн тамгын газраас илэрхийлсэн гэв. Шав тавих ёслолын үеэр О.Магнай болон Ж.Батзандан нар ирсэн байсан. Хоёр жилийн өмнө Ж.Батзандан тэргүүтэй иргэний эвслийнхэн сонгуулийн дүнг эсэргүүцэн жагсаал хийсэн. Уг жагсаал нь яваандаа хэний ч төсөөлөөгүй үймээн болон хувирна хэмээн тэд өөрсдөө ч бодоогүй байсан биз. Зарим хүн О.Магнай, Ж.Батзандан нараас болж долдугаар сарын 1 түүхэнд хараар тэмдэглэн үлдсэн гэж үзэх нь бий. Харин тэд өөрсдийгөө гол буруутан нь гэж боддог уу, аль эсвэл.
Уг асуултын хариултыг АТГ-ын олон нийтийн зөвлөлийн дарга Ж.Батзандангаас тодрууллаа.
-Үймээн болсноос хойш хоёр жил өнгөрлөө. Энэ үймээнд О.Магнай та хоёрыг буруутгах хүмүүс олон байдаг?
-Зарим хүн биднийг ийм байдалд хүргэсэн гэж ярьдаг. Жагсаал хийсний төлөө иргэд рүүгээ буу шагайна гэдэг байж болохгүй зүйл. Ийм улс орон байх ёсгүй.
-Таныхаар хэн хариуцлага хүлээх ёстой вэ?
-Улс төрийн хэлмэгдүүлэлтэд өртсөн хүмүүсийн дурсгалыг бид өнөөдөр хүндэтгэж байна. Жил бүрийн долдугаар сарын 1-нд арга хэмжээ зохион байгуулах болно. Цаашдаа ийм зүйл бүү давтагдаасай. Гэхдээ өнөөдөр хариуцлага алга. Тушаал өгсөн дарга нарт хатуу хариуцлага тооцох ёстой гэж хэлмээр байна. Тэрбээр ингэж ярив.
Юугаар ч үнэлж баршгүй зүйл бол хүний амь гэдэгтэй уншигч та санал нийлэх биз ээ. Таван залуугийн ар гэрийнхэн нандин эрдэнэ болсон хүмүүсээ нэг л өдөр алдсан. Эдгээр хүмүүсийн сэтгэлийн уй гашууг нимгэлэх үүднээс төр засаг нөхөн олговор олгосон билээ. Хохирогчдын ар гэрийнхэн нөхөн олговороо гүйцэд авсан эсэх, долдугаар сарын 1-ний аймшигт өдрийн талаар ямар бодолтой явдаг талаар асуулаа.
Талийгаач С.Ганбаатарын гэргий А.Оюунбилэг:
-Бид төр засгаас хохирсон хүмүүсээсээ уучлалт гуйгаач гэж хүсч байна. Энэ хүсэлтийг тавиад хоёр жилийн нүүр үзлээ. Өнөөдрийг хүртэл биднийг хүлээн авч, тоож уулзах хүн алга. Ер нь хүний амийг мөнгөөр үнэлнэ гэж байдаггүй. Манай улс хэлмэгдсэн хүний амийг 50 сая төгрөгөөр үнэлсэн. Биднийг доромжилж байна гэж бодож байна. Эрх баригчид “Эдэнд 50 сая төгрөгийн нөхөн олговор хангалттай” гэж байсан.
-Жил бүрийн энэ өдөр бид амь үрэгдсэн хүмүүсийн дурсгалыг хүндэтгэх болно. Нөхөн олговор гэж 50 сая төгрөг өгсөн. Энэ мөнгө юу ч биш. Дарга нарын унадаг машиных нь үнэд хүрэхгүй л мөнгө.
Талийгаач Э.Доржсүрэнгийн аав Ц.Энхбаяр:
-Нөхөн олговрыг би аваагүй. Засгийн газар уучлалт гуйхаас нааш авахгүй гэдгээ хэлсэн. Уучлалт гуйх хэрэгтэй.
Үймээний үеэр олон хүн, албан байгууллагууд хохирсон. Үүний нэг бол Соёлын төв өргөөнд байрлах Монголын уран зургийн галерей юм. Соёлын үнэт зүйл болсон уран зургууд шатсан. Харин уран зургийн галерей болон бусад байгууллагын хохирлыг барагдуулсан болов уу. Энэ талаар Хууль зүй, дотоод хэргийн яамны мэргэжилтнээс тодруулахад “Бид шүүхийн шийдвэрийн дагуу нөхөн олговрыг олгож байгаа. Шийдвэр нь гарсан ч нөхөн олговор олгоогүй байгууллага байхгүй” гэв. Энэ үеэр халдлагад өртсөн уран зургийн галерейн менежер Г.Ялалтаас нөхөн олговор олгосон тухай лавлахад “Бид галд өртсөн сан хөмрөгийн бүтээлүүдээ сэргээн засварлахын тулд төсөл бичин Нидерландын байгууллагын тусламжийг авсан. Түүнээс бус Засгийн газраас ямар ч нөхөн олговор өгөөгүй” хэмээсэн юм.
Ц.Энхцэцэг
Зохиогчийн эрх:
"Улс төрийн тойм" сонин
Холбоотой мэдээ