“Foxconn” компани “Apple” компанийн захиалгаар үйлдвэрлэж байгаа цахим төхөөрөмжүүдийг Хятадын өмнөд бүсийн, ХонгКонгтой хиллэдэг Шенжень хотоос нүүлгэж, төв, умард хятадад үйлдвэрлэхээр зэхэж байна гэж “CNN” агентлаг мэдээллээ. Олон тооны ажилчид нь амиа хорлосонтой холбоотойгоор ажилчдын цалинг огцом нэмсний дараа үйлдвэрлэлийн зардлаа бууруулах үүднээс ийм алхам хийж байгаа тухай Тайвань эзэнтэй “Foxconn” компани ярьсан байна. “Foxconn” компани дэлхийн хамгийн том цахим хэрэгсэл үйлдвэрлэгчдийн нэг бөгөөд “дэлхийн аж үйлдвэрийн цех” гэгддэг Хятадын өмнөд хэсэгт технологийн дэвшилтэй хөл нийлүүлэн ажилладаг юм. “Apple” компани “Foxconn”-ы хамгийн том хэрэглэгч. “Foxconn” нь Тайваньд хувьцаа гаргасан “Hon Nai” компанийн охин компани бөгөөд “Apple” компанийн “iPod”, “iPhone”, “iPad” зэрэг бүтээгдэхүүнүүдийг үйлдвэрлэдэг юм.

“Foxconn” компани үйлдвэрлэлээ хаана ч байрлууллаа гэсэн тэр нь дэлхийн технологийн үйлдвэрлэл Хятадын өмнөд хэсэг, Шанхайд төвлөрч байгаа төвлөрлийг багасгах юм. Шенжень дэх ажилчид нь цалин нэмэх шаардлага тавьсан талаар “Foxconn” компани “Apple” компанитай хэлэлцээр хийснийг нь “Apple” компани нааштайгаар хүлээн авч, ажилчдын цалин нэмэх асуудлыг нааштайгаар шийдсэн билээ.

“Foxconn” компани “Apple” компанид хоёр үйлдвэрлэлийн байршил санал болгосон байна. Нэг нь хойд зүгт байгаа Тианжин бөгөөд тэнд “Foxconn” компанийн үйлдвэр угаасаа байдаг билээ. Нөгөө нь Хятадын төвд орших хүн ам ихтэй Хенан муж юм. Бусад брэндийн цахилгаан хэрэгслийн компаниудтай харьцуулбал “Apple” компани цөөн тооны үйлдвэрлэгчтэй харилцдаг бөгөөд илүү нягт харилцаатайгийнхаа төлөө нэмэлт төлбөр хийдэг юм. Энэ харилцаа нь АНУ-ын тус компанид “Foxconn” компанийн дотоод асуудлын талаар санал бодлоо илэрхийлэх эрх олгодог байна.
Хятадад “Foxconn” компанийн 800.000 ажилчин байдгийн 100.000 нь “Apple” компанийн бүтээгдэхүүн дээр ажилладаг гэж судлаач нар үздэг. “Apple” компани Хятадын Шанхай, Сужоу хотуудад байрладаг Тайванийн “Quanta Computer” компанитай мөн хамтарч ажилладаг билээ. “Foxconn” компанийн Шенжень хот дахь Лонгхуа үйлдвэрт олон зуун мянган хүн ажилладаг бөгөөд 2008 оны дэлхийн эдийн засгийн хямралын үеэр ажилчдынх нь тоо 200.000 болж буурсан бол одоо эргэн нэмэгдэж, 300.000 хүрсэн ба “Apple” компанийн “iPad” болон “iPhone”-ын борлуулалт нэмэгдэж байгаатай холбоотойгоор гуравдугаар улиралд ажилчдынхаа тоог дахин нэмнэ хэмээн тооцоолж байгаа аж.

Т.Бадрах