Энэ сарын 19-ний өдөр Торонто хотноо “Элчин сайдын яамны цом-2010” сагсан бөмбөгийн тэмцээн Канад Улсад оршин сууж буй бүх Монголчуудын дунд анх удаа зохион байгуулагдав. Канад Улсад суугаа Монгол Улсын Элчин Сайдын Яам болон Канадад оршин суугаа Монголчуудын холбоодын хамтран зохион байгуулсан энэхүү арга хэмжээнд Торонто хотын 3, Ванкувер хотын 2, Калгари, Монреаль хотын тус бүр нэг баг оролцсон бөгөөд дэд байрыг Баттүшиг ахлагчтай Ванкувер хотын нэгдүгээр баг, тэргүүн байрыг Баттулга ахлагчтай Торонто хотын хоёрдугаар баг тус тус эзэлж, “ЭСЯ цом-2010”-ын эзэн болов.

Монгол Улсаас Канад Улсад суугаа Онц бөгөөд Бүрэн Эрхт Элчин сайд Т.Залаа-Уул “ЭСЯ-ны цом-2010” Канад дахь Монголчуудын спортын наадмыг нээж үг хэлэв. Тэрээр Канад Улсад оршин сууж буй монголчууд анх удаа нэг дор хуран чуулж, спортоор хүч үзэн өрсөлдөж байгааг цохон тэмдэглээд, алслагдмал хотуудаас энэхүү тэмцээнд ач холбогдол өгч хүрэлцэн ирсэн Ванкувер, Калгари, Монреаль хотын багийнхан болон хүлээн авагч Торонто хотынхонд талархал илэрхийлж Монголчуудын холбооноос зохион байгуулах аливаа үйл ажиллагааг ЭСЯ дэмжинэ гэв. 6 дугаар сарын 25-27-ны өдрүүдэд Канадын Мархам хотноо зохион байгуулагдах Азийн наадмын хүрээнд болох “Азийн спортын тоглолт”-д оролцох манай баг тамирчдыг энэхүү тэмцээнээс сонгон шалгаруулжээ.

“ЭСЯ-ны цом-2010” спортын наадмын үеэр монгол иргэдэд консулын явуулын үйлчилгээ үзүүлсэн талаар Гадаад Харилцааны яамны хэвлэлийн албанаас мэдээллээ.