Тавантолгойн ордод олборлолт хийх компанийн тендерийн санал авах хугацаа энэ сарын 27-ныг  хүртэл хойшилсон байсан. Гэтэл энэ хугацаа дахиад л хойшилсон. “Эрдэнэс Тавантолгой” ХК-ийн баасан гарагт болох ТУЗ-ийн хурлаар уг асуудлыг шийдэхээр болсон хэмээн мэдэгдэж байсан юм. Гэсэн ч өнгөрсөн баасан гарагт болох байсан ТУЗ-ийн хурал ч мөн л хойшилжээ. Учир нь Төрийн өмчийн хороо, “Эрдэнэс МГЛ” ХК, Хэвлэлийн хүрээлэн, АНУ-ын “USIAD” байгууллагатай хамтран сэтгүүлчдэд өнгөрсөн баасан гарагт “Эрдэнэс тавантолгой” ХК-ийн хувьцааг хэрхэн олгох талаар сургалт зохион байгуулж таарсан. Уг нь энэ сургалтыг зохион байгуулах тухайгаа ТӨХ-ноос 14 хоногийн өмнөөс мэдээлж байсан. Гэтэл “Эрдэнэс Тавантолгой” ХК-ийн ТУЗ хуралдах болоход цаг хугацаа нь дав­хацчихсан гэсэн “марзан” тайлбарыг ТУЗ-ийн гишүүд хэлж байгаа юм.

Энэ талаар “Эрдэнэс таван­толгой” ХК-ийн ТУЗ-д ард түмний төлөөлөл болж орсон Ж.Батзандангаас тодрууллаа.
 
-“Эрдэнэс Тавантолгой” ХК-ийн ТУЗ-ийн хурал дахиад л хойшиллоо. Шалтгааныг нь танд хэрхэн тайлбарласан бэ?

-Би ТУЗ-ийн хурал хойшилсныг мэдээгүй. Энэ тухай өөрөөс тань л сонсч байна. Хуралдаа оролцох гээд ТУЗ-ийн дарга Д.Сугарыг утасдахыг хүлээж байлаа.

-ТУЗ-ийн хурал хойшилж байгаа нь хурлаар шийдэх асуудлуудад ямар нэгэн лобби орох вий гэсэн хардлага дагуулж байна. Та ард түмний төлөөлөл болж ТУЗ-д сонгогдсоны хувьд энэ бүхэнд ямар хяналт тавьж байна вэ?

-Төрийн өмчийн хороо болон “Эрдэнэс Тавантолгой” ХК-ийн материалаас гадна 2011 оны төсөв, ажлын төлөвлөгөөг уншиж байна.  Тендерийн санал авах хугацааг хойшлуулж байгааг хүмүүс хардаж байгаа ч бүх юм хууль журмын дагуу явж байгаа гэж хэлмээр байна.

Зохиогчийн эрх:
"Улс төрийн тойм" сонин