Үндэсний шинэ намаас “Монгол ньюс” мэдээллийн төвд сэтгүүлчдэд хандан мэдээлэл хийлээ. Тэд энэ сарын 18-ны өдөр хуралдсан ҮШН-ын бага хурлаар “Амлалт нэхэх ард түмний холбоо”-ны ерөнхий зохицуулагч Г.Уянгыг ҮШН-ын ерөнхий нарийн бичгийн даргын албанд тохоон томилсон тухай, мөн намын гишүүн Н.Батцэрэгийг ҮШН-ын дэд даргаар томилж байгаа талаар мэдээллээ. ҮШН-ын дэд дарга Н.Батцэрэг өмнө нь 1996-2000 оны парламентад ажиллаж байсан туршлагатай, ҮШН-ын нөлөө бүхий гишүүн учир дэд даргаар томилох шийд гаргасан байна. Харин ерөнхий нарийн бичгийн дарга Г.Уянга ҮШН-д элсэх болсон шалтгаанаа “Өнгөрөгч дөрөвдүгээр сарын 5-ны өдрөөс эхлүүлсэн “Улс үндэстнээ аврах” тэмцлийн дараагаар дэмжигчид олон байгааг олж харсан ч АНАТХ-ны тэмцлийг ихэнх дэмжигчид гэртээ телевиз үзэж, бодолдоо дэмжихээс хэтрээгүй. Арваад жил гудамжинд тэмцсэн боловч хүссэн үр дүнд хүрээгүй байгаа зэргээс үүдээд ҮШН-д орох болсон” хэмээлээ. Мөн ҮШН хөдөө орон нутагт “Үндэсний илч” томилж, үндэсний үзлийг дэмжих төлөөлөгчдийг бий болгохоор ажиллаж байгаагаа хурлын үеэр ярилаа. ҮШН-д АНАТХ-ны ерөнхий зохицуулагч Г.Уянгыг дагаж олон залуус элсэн орж байгаа гэнэ. Харин намын хуучин гишүүд олон жил улстөрд ажилласан туршлагатай гэж өөрсдийгөө үзэж байна.

Б.Алтансүх