Газрын тосны “Бритиш Петролиум” компани Мексикийн буланд алдагдаж байгаа газрын тос байгаль бохирдуулж байгааг цэвэрлэж, байгалийн нөхөн сэргээлт хийхэд болон учирсан хохирлыг арилгахад зориулж 20 тэрбум ам.доллар төлөхөөр тохиролцсон талаар Цагаан Ордоноос АНУ-ын ерөнхийлөгч Барак Обама мэдэгдлээ. Үүнтэй холбоотойгоор энэ жил хувьцаа эзэмшигчиддээ ноогдол ашиг хуваарилахгүй гэж “Бритиш Петролиум” компанийн захирал Карл-Хенрик Сванберг мэдэгдлээ. Нөхөн төлбөрийн санг 9/11 үйл явдлын дараа нөхөн төлбөрийн асуудал хариуцаж байсан хуульч Кеннет Файнберг хариуцах юм байна.

“Бритиш Петролиум” компани нөхөн төлбөрт 20 тэрбум ам.доллар төлж байгаа нь тус компаний бараг нэг жилийн ашигтай дүйцэж байгаа юм. Мэдэгдэл хийснийхээ дараа Сванберг захирал “болсон эмгэнэлт явдалд харамсаж, уй гашуутай байгаагаа илэрхийлсэн бөгөөд ийм үйл явдал огтхон ч болох ёсгүй байсан. Манай компани даваа гаригт 2.6 тэрбум ам.долларын ноогдол ашиг тараах байсан ч үүнийгээ цуцалж байна. Түүнчлэн ирэх жилүүдэд учрах нэмэгдэл зардлыг төлөхийн тулд тус компани 10 орчим тэрбум ам.долларын хөрөнгөө зарах гэж байна” гэж ярьсан байна. Бритиш Петролиум компани үүнээс өмнө хамгийн сүүлд дэлхийн хоёрдугаар дайны үед хувьцаа эзэмшигчиддээ ноогдол ашиг хуваарилахгүй байх шийд гаргаж байжээ.

Т.Бадрах