УИХ-ын гишүүн Д.Оюунхорол, Эрүүл мэндийн дэд сайд Ж.Цолмон, УИХ-ын даргын зөвлөх С.Банзрагч нар АНУ-ын Вашингтон хотноо энэ сарын 7-9-ний өдрүүдэд зохион байгуулж буй  “Эмэгтэйчүүдийн асуудал -2010” олон улсын бага хуралд оролцлоо. Энэ бага хуралд 146 орны Парламент, Засгийн газар, төрийн бус байгууллага, иргэний нийгэм, хувийн хэвшлийн 3500 гаруй төлөөлөгчид оролцож, НҮБ-ын  Мянганы хөгжлийн дөрөв болон тавдугаар зорилтыг тус тус хангах асуудал, тухайлбал жирэмсэн эхчүүдийн болон хүүхдийн эндэгдлийг багасгах, эх нялхсын эрүүл мэндийг хамгаалах талаар хэрэгжүүлэх бодлого, стратеги, шаардлагатай хөрөнгө оруулалт, санхүүжилтийг шийдвэрлэх зэрэг олон асуудлыг хэлэлцсэн байна. Хуралд оролцож буй улс орнуудын парламентын эмэгтэй гишүүд болон Эрүүл мэндийн сайд нар эдгээр асуудлыг тусгайлан авч хэлэлцсэн бөгөөд цаашид парламент, засгийн газрын зүгээс хэрэгжүүлэх бодлого, үйл ажиллагааны талаар тус тус мэдэгдэл  гаргажээ.