Дэлхийн аварга шалгаруулах тэмцээнд Италийн шигшээг ахлах Фабио Каннаваро олныг алмайруулсан шийдвэр гаргажээ. Өдгөө 36 настай тэрбээр Дубайн багт хөлбөмбөгийн агуу замналаа дуусгахаар шийдсэн байна. Тодруулбал, Каннаварогийн “Ювентус”-тэй байгуулсан гэрээ дуусч, Сери А-гаас түүнд баг олдоогүй учир Арабын Нэгдсэн Эмиратын лигийн аварга “Аль Ахли” клубтэй хоёр жилийн хугацаатай гэрээг үзэглэсэн аж. Тус клубын албан ёсны вэбсайтад мэдээлснээр Өмнөд Африкт болох ДАШТ өндөрлөсний дараа Каннаваро Дубайд ирэх гэнэ. Энэ талаар “Аль Ахли” клубын захирлуудын зөвлөлийн тэргүүн Абдуллах Аль Набууда “Фабио Каннаваротой хоёр жилийн хугацаатай гэрээ байгуулсан. Каннаваро шиг дэлхийн хэмжээний шилдэг тоглогчтой гэрээ байгуулсан нь бидний хувьд чухал алхам боллоо. Учир нь тэр туршлагатай, авьяаслаг тоглогчоос гадна талбайд үргэлж лидер байж чаддаг” гэжээ.
2006 онд дэлхийн аваргын финалд Италичууд Францыг хожиж, “Алтан дагина” хүртэхэд Каннаваро багаа ахлан талбайд гарч байсан бөгөөд улсынхаа төлөө нийт 132 тоглолтод оролцоод байгаа юм. Харин энэ удаагийн дэлхийн аварга түүний хувьд дөрөв дэх нь бөгөөд ДАШТ-ий дараа олон улсын карьераа орхино гэдгээ мэдэгдээд байгаа билээ.
Тэрбээр “Интер Милан”, “Реал Мадрид” зэрэг Европын топ клубуудад тоглож байгаад 2009 онд “Ювентус”-т ирсэн юм. Харин түүний гэрээний хугацаа дуусмагц хөлбөмбөгийн замналаа эхлүүлсэн “Наполи” клубт тоглохыг хүсч байжээ. Каннаваро энэ талаар “Ювентустэй гэрээ сунгана гэсэн сонголт байгаагүй. Би Наполид очихыг хүсч байсан, харин тэдэнд би хэрэггүй бололтой. Гэхдээ ирэх улиралд Аль Ахлид тоглох болсондоо баяртай байгаа. Би хэдийнээс Дубайд очиж амьдрахыг хүсдэг байсан, тэр хот надад маш их таалагддаг. Мөрөөдөл минь биелж байна гэх үү дээ” хэмээн Италийн спортын сонинд өгсөн ярилцлагадаа дурджээ.
Дашрамд сонирхуулахад, “Аль Ахли” клубын удирдлага Премьер лигийн “Тоттенхэм” клубын дасгалжуулагч Харри Реднэппийг урвуулахаар ярилцаж эхэлсэн байна.

С.Цэлмэг