Английн Премьер лигийн “Манчестер Сити” клубын довтлогч Эммануэль Адебайор Испанийн эзэн хааны “Реал Мадрид” багийн гишүүн боллоо. Того улсын довтлогч энэ улирлыг дуустал “Реал”-д зээлээр тоглох бөгөөд хуучин багийнх нь менежер болох Роберто Манчини түүний итгэлийг алдсан гэдгийг өгүүлсэн байна. Өчигдөр Сантьяго Бернабеу цэнгэлдэхэд Жозе Моуриньогийн удирдаж буй “Реал Мадрид” шинэ цэрэг Эммануэль Адебайорыг танилцууллаа. Түүний хувьд одоогоос 18 сарын өмнө “Арсенал”-аас “Сити”-д ирж байсан бөгөөд багийн дасгалжуулагч Марк Хьюз нь Роберто Манчинигаар солигдсоноос хойш гараанд гарах нь багассан билээ. Мөн энэ улиралд “Интер Милан”-аас Марио Балотелли ирснээр Адебайорын “Сити” дэх ирээдүй бүрхэг болсон. Тиймээс Адебайорт өөрийгөө харуулах боломж дахин гарч ирж байна. Тэрбээр “ Манчини болон Манчестер Ситид ямар асуудал байсан бэ гэж үү? Миний бодлоор тийм ч их асуудал байгаагүй. Гэхдээ Манчини миний итгэлийг үгүй хийсэн. Тэр надад итгэдэггүй. Тэр өөр тоглогч сонгосон. Тиймээс би Реал Мадридын төлөө бөмбөг тоглох болсондоо маш их баяртай байна. Энэ багийн төлөө тоглох нь надад таалагдана гэж найдаж байна” хэмээн ярьжээ.

“Реал” одоогоор Ла лигт тэргүүлэгч “Барселона”-гаас дөрвөн оноо дутуу хоёрдугаар байрт бичигдээд байгаа. Харин Адебайор Испанийн лигийн цомыг хүртэж чадна гэдэгтээ итгэлтэй байна. Энэ талаар тэр “Тийм ээ, Мадрид Барсагийн дээр гарч чадна. Хэрвээ би тийм бодолгүй байсан бол энд ирэхгүй шүү дээ. Бид хичээвэл хүссэн амжилтдаа хүрч чадна. Би Манчестер Ситид үлдэж болох л байсан. Гэвч би энд мөрөөдлөө биелүүлэхээр ирсэн. Би тоглолт бүрт гоол оруулна гэж амлаж чадахгүй. Гэхдээ хамгийн сайнаа гаргах болно гэдгийг л хэлмээр байна. Барса биднээс дөрвөн оноо илүү байгаа. Одоо бид гэртээ тэднийг ялах хэрэгтэй. Бас тэднийг зочлон тоглолтод оноо алдана гэж найдаж байна. Харин манай баг айлын талбай дээр байж болох бүх оноог авах болно. Тэгээд эцэст нь бид аварга болно” гэжээ.

Адебайорын хувьд “Арсенал”-д байхдаа 142 тоглолтод оролцож, 62 гоолыг оруулсан. “Реал”-ын гол довтлогч Гонзало Игуаин нурууны бэртлийн улмаас дөрвөн сар орчим хугацаанд талбайд гарахгүй болсон нь Адебайорт боломж олгож байгаа юм.