Японы их сумогийн нацу башёгийн 12 дахь өдрийн барилдаан өнөөдөр болох билээ. 11 өдрийн барилдааны дараах байдлаар зуун хувийн амжилтаар башёг ганцаараа тэргүүлж буй их аварга Хакухо М.Даваажаргал энэ өдөр шинэ озэки Барутотой барилдахаар оноолт таарсан байна. Башёгийн хамгийн сонирхолтой, үзүүштэй барилдааны нэг болох Хакухо, Баруто нарын тулаан өнөөдрийн хамгийн сүүлийн барилдаан байх болно. Мөн өнөөдөр озэки Харумафүжи Д.Бямбадорж озэки Кайотой барилдах бол энэ башёд амжилттай барилдаж буй Хакуба А.Өнөржаргал /М5/ Болгарын озэки Котоошютай барилдахаар болжээ. Манай бусад бөхчүүдийн тухайд Тамаваши Б.Мөнх-Оргил /М7/ Ваканосатотой, Какурюү М.Ананд /М3/ Какизоэтэй, Асасэкирюү Б.Дашням /М4/ Арантай, Токитэнкү А.Хүчитбаатар /М6/ Токүсэгаватай тус тус учраа тааран барилдах юм. Түүнчлэн Кёкүтэнхо Н.Цэвэгням /М7/ Шимоторитой, Коорюү Э.Мөнх-Оргил /М16/ Окиноумитой барилдах бол Моконами Г.Базарсад /М11/ Ёшиказэтэй барилдахаар оноолт таарчээ.

С.Цэлмэг