Токио хотын Кокугикан ордонд 11 дэх өдрөө үргэлжилж буй Японы мэргэжлийн сумо бөхийн нацу башёд макүүчи зиндаанд зодоглож байгаа манай бөхчүүд өнөөдөр ямар бөхтэй барилдахаар оноолт таарсан талаар танилцуулъя. 10 өдрийн барилдааны дараах байдлаар зуун хувийн амжилтаар башёг ганцаараа тэргүүлж буй их аварга Хакухо М.Даваажаргал өнөөдөр баруун жигүүрийн озэки Кайотой барилдах бол шинэхэн озэки Баруто манай бөх Харумафүжи Д.Бямбадоржтой барилдахаар оноолт таарчээ. Өчигдрийн барилдаанд озэки Харумафүжиг давж, башёгийн найм дахь даваагаа авсан Хакуба А.Өнөржаргал /М5/ өнөөдөр озэки Котомицүкитэй учраа тааран барилдана. Мөн өнөөдрийн барилдаанд Какурюү М.Ананд /М3/, Асасэкирюү Б.Дашням /М4/ нарын манай хоёр бөх хоорондоо барилдахаар оноолт таарсан бол Токитэнкү А.Хүчитбаатар /М6/, Моконами Г.Базарсад /М11/ нар мөн хоорондоо барилдахаар болжээ. Манай бусад бөхчүүдийн тухайд Тамаваши Б.Мөнх-Оргил /М7/ Токүсэгаватай, Кёкүтэнхо Н.Цэвэгням /М7/ Арантай, харин Коорюү Э.Мөнх-Оргил /М16/ Точинонадатай тус тус хүчийг үзэн барилдана.

С.Цэлмэг