Аргентиний теннисчин Дэвид Налбандян булчингийн гэмтлийн улмаас “Их дуулга”-ын цуврал болох Францын нээлттэй тэмцээнийг өнжих болсон тухайгаа өөрийн цахим хуудсандаа мэдээлжээ. Дэлхийд чансаагаараа гуравдугаарт бичигдэж байсан Налбандян өмнө нь Парисын тэмцээнд хоёр ч удаа хагас шигшээд шалгарч байсан юм. Харамсалтай нь тэрбээр сүүлийн үед гэмтэл бэртлээс салахаа больж, уралдаан, тэмцээнээс хол хөндий байлаа. Тэрбээр өнгөрөгч нэгдүгээр сараас хойш өвдөгний гэмтлийн улмаас Барселон, Ромын тэмцээнийг өнжсөн бөгөөд өдгөө дэлхийн чансааны жагсаалтад 150-рт эрэмбэлэгдээд байгаа юм.
Энэ сарын 23-нд эхлэх Францын нээлттэй тэмцээнд Налбандянаас гадна түүний нутаг нэгт Хуан Мартин дел Потро, ОХУ-ын Николай Давыденко, Францын Гиллес Симон нарын шилдгүүд мөн гэмтлийн улмаас оролцохгүй гэдгээ мэдэгдээд байна.

С.Цэлмэг