Хойд Америкийн Үндэсний сагсан бөмбөгийн холбооны “Сан-Антонио Спөрс” багийн хамгаалан тоглогч Ману Жинобилли болон түүний хайрт эхнэр Мэни нар ихэр хөвгүүдээ өлгийдөн авчээ. Жинобилли өөрийн Twitter дэх цахим хуудсаараа дамжуулан шинэхэн ээж болон нярай ихрүүд сайн байгаа гэдгийг дуулгасан бөгөөд удалгүй бичлэгээ шинэчилж, “Би анх удаагаа живх сольж үзлээ” хэмээн бичсэн байна.
Жинобиллигийн “Спөрс” плей-оффын хоёрдугаар шатанд “Финикс Санс”-т 4:0 харьцаатай цуврал тоглолтод ялагдсанаар энэ улирлын тэмцээнээ дуусгасан билээ. Харин Жинобилли өөрөө энэ зун Туркт эхлэх FIBA-гийн дэлхийн аварга шалгаруулах тэмцээнд оролцохгүй, харин оронд нь гэр бүлийнхэнтэйгээ амралтаа өнгөрүүлж, эрүүл саруул байх талаар анхаарлаа хандуулна хэмээн мэдэгдэж байсан юм.

С.Цэлмэг