Францын теннисчин Аравань Резай Мадрид Мастерс тэмцээний финалд алдарт теннисчин Венус Уильямсыг дараалан хоёр сетэд буулган авч, талбайн теннисний ертөнцөд томоохон дуулиан дэгдээлээ. Өдгөө 23 настай Резай Мадридын тэмцээнээс өмнө WTA Tour-ын цувралд ердөө хоёрхон удаа буюу Страсбург болон Балигийн тэмцээнд түрүүлж байжээ. Тэрбээр өчигдрийн тоглолтолд 6-2; 7-5 харьцаатай ялалт байгуулсан байна. Дэлхийн чансааны жагсаалтад төрсөн дүү Серенагийн араас хоёрдугаарт эрэмбэлэгдээд буй Венус эхний сетэд ердөө 27-хон минутад ялагдсан бөгөөд хоёрдугаар сетэд 4-1 харьцаатай хошуучилж байсан боловч дараалан бөмбөг алдсанаар ялагдал хүлээжээ.
Дэлхийд чансаагаараа 24-рт бичигдээд буй Резай тэмцээний дараа “Би үнэхээр өөртөө ч итгэхгүй байна. Венус сайн тоглосон. Би түүнийг тамирчных нь хувьд, бас аваргынх нь хувьд үргэлж хүндэлдэг. Харин өнөөдөр би байдгаараа хичээж, үр дүнг нь үзлээ” гэжээ.

С.Цэлмэг