Мэргэжлийн сумо бөхийн зуны башёгийн найман өдрийн барилдааны дараах байдлаар зуун хувийн амжилтаар башёг ганцаараа тэргүүлж буй их аварга Хакухо М.Даваажаргал өнөөдөр зүүн жигүүрийн маэгаширагийн гурав дахь бөх Какурюү М.Анандтай барилдахаар оноолт таарчээ. Какурюүгийн хувьд өчигдрийн барилдаанд шинэхэн озэки Барутог өвдөг шороодуулж, ид бяраа гайхуулсан билээ.
Нацу башёд макүүчи буюу дээд зиндаанд барилдаж манай бусад бөхчүүд өнөөдөр хэнтэй барилдахаар учраа таарсан талаар танилцуулбал, озэки Харумафүжи Д.Бямбадорж Ваканосатотой, Асасэкирюү Б.Дашням /М4/ озэки Котоошютай барилдах бол Хакуба А.Өнөржаргал /М5/ Гоэйдотой, харин Токитэнкү А.Хүчитбаатар /М6/ Окиноумитай тус тус учраа тааран барилдана. Түүнчлэн Тамаваши Б.Мөнх-Оргил /М7/ Кимураяматай, Коорюү Э.Мөнх-Оргил /М16/ Такэказэтэй тус тус барилдах бол Моконами Г.Базарсад /М11/, Кёкүтэнхо Н.Цэвэгням /М7/ нар хоорондоо барилдахаар оноолт таарчээ.

С.Цэлмэг