Олимпийн наадмын эрх олгох цуврал тэмцээний эхнийх нь болох өнгөрсөн долоо хоногт болсон Тунисын гран-при тэмцээнд оролцсон манай жүдочид маргааш Египетийн нийслэл Кайро хотноо эхлэх “Дэлхийн цом”-ын тэмцээнд оролцоно. Амралтын өдрүүдэд зохиогдох тус тэмцээнд манай улсаас эрэгтэй найм, эмэгтэй хоёр жүдоч шигшээ багийн дасгалжуулагч П.Нямлхагвын удирдлага дор өрсөлдөх бөгөөд тэмцээний дараа гурав хоног олон улсын тамирчидтай хамтарсан бэлтгэл хийгээд эх орондоо ирэх юм.
Тэмцээний сугалаа өнөөдөр орой гарах ба маргааш буюу тэмцээний эхний өдөр эрэгтэйчүүдийн 60, 66 болон 73 кг, эмэгтэйчүүдийн 48, 52, 57 болон 63 кг-ын жингийн барилдаанууд болно. Харин манай тамирчдаас 60 кг-д Ч.Болдбаатар, 66 кг-д Б.Хишигбаяр, Д.Дөлгөөн, 73 кг-ын жинд Г.Пүрэвдорж, эмэгтэйчүүдийн 48 кг-д М.Уранцэцэг, 63 кг-д Ц.Мөнхзаяа нар Египетийн татамид гарч барилдана. Харин үлдсэн жингийн барилдаанууд ням гаригт болох юм.
“Дэлхийн цом”-д өрсөлдөх манай тамирчид:
Эрэгтэй: Ч.Болдбаатар /60 кг/, Б.Хишигбаяр /66 кг/, Д.Дөлгөөн /66 кг/, Г.Пүрэвдорж /73 кг/, Б.Амбасэлмаа /81 кг/, Б.Ариун-Эрдэнэ /90 кг/, Н.Түвшинбаяр /-100 кг/, Б.Сугаржаргал /+100 кг/
Эмэгтэй: М.Уранцэцэг /48 кг/, Ц.Мөнхзаяа /63 кг/

С.Цэлмэг