Нийслэлийн цагдаагийн газ­рын дарга, хурандаа С.Баатаржав,  Шударга өрсөлдөөн, хэрэглэгчийн төлөө газрын дэд дарга Ц.Дорж­палам нар  Архидан сог­туурахтай тэмцэх тухай, Зар сурталчилгааны тухай, Хэрэг­лэгчдийн эрхийг хамгаалах тухай, Өрсөлдөөний тухай хуулиудыг хэрэгжүүлэх зорилгоор хамтран ажиллах санамж бичигт өчигдөр  гарын үсэг зурлаа. Энэ үеэр Шударга өрсөлдөөн хэрэглэгчийн төлөө газрын Улсын байцаагч Д.Гантөмөрөөс   хууль бус архины сурталчилгааны эсрэг авч буй арга хэмжээ, зөрчлийн талаар зарим асуултанд хариулт авлаа.

-Он гарснаас хойш архи, сог­тууруулах ундаа сурталчилсан бай­гуул­лагуудад ямар арга хэмжээ авсан бэ?

-Согтууруулах ундааны далд сурталчилгаа байсаар байна. Ялангуяа баяр наадам, тэмдэглэлт өдрүүдээр идэвхитэй болдог. Өнгөрсөн оны наймдугаар сараас хойш 100 гаруй аж ахуйн нэгж байгууллага, иргэдийг шалгаж 51 сая төгрөгийн торгууль ногдуулсан. Харин он гарсаар Зүүн хараа трейд, Жем интернэшнл, СББ, М Ти Эс, UFC, MCS, Спорт бал бурам  зэ­рэг томоохон үйлдвэрлэгчид рек­лам зар сурталчилгааг теле­виз, өдөр тут­мын сонин, сэт­гүүл, интер­нэт сайтуудаар дамжуулан олон ний­тэд түгээсэн. Одоогийн байдлаар UFC, Жем интернэшнл компаниудад 15-20 сая төгрөгийн торгууль ногдуулаад байна.

-Нэг байгууллагыг 10-20 сая төгрөгөөр торголоо гээд үр дүн байгаа юм уу?

-Мэдээж эхний ээлжинд тор­гоно. Захиргааны хариуцлага хү­лээл­гэнэ. Энэ үйлдлээ удаа дараа давтсан тохиолдолд үйлдвэрлэл эрхлэх тусгай зөвшөөрлийг нь хүчингүй болгох хүртэл арга хэмжээ авна.

-Хэдэн удаа хууль зөрчвөл тус­гай зөвшөөрлийг нь хүчингүй болгох вэ. Үүнийг хэрэгжүүлэхэд хүндрэлтэй юу?

-Одоогоор хэдэн удаа гэ­сэн тодор­хой зүйл байхгүй. Үү­нийг харилцан зөвшилцөж байж шийдвэрлэнэ. Монголдоо томоохонд тооцогдох үйлдвэрүүд учир шууд л зөвшөөрлийг нь хүчингүй болгоно гэдэг хүнд­рэлтэй. Энэ асуудлыг дан ганц манай байгууллага мэдэхгүй. Бид саналаа Хүнс, хөдөө аж ахуй, хөнгөн үйлдвэрийн яаманд тавьж, хамтран хэлэлцэж байж шийдэх асуудал юм.

-Хууль бус сурталчилгаа явуулс­ныхаа төлөө төлсөн торгуулийн мөнгийг хаана, хэн, хэрхэн зарцуулдаг вэ?

-Энэ мөнгө шууд төрийн санд ордог. Торгуулийн мөнгөнөөс ма­най байгууллагад нэг ч төгрөг ордоггүй. Бид чиг үүргийнхээ дагуу хяналт тавьж, хариуцлага тооцох ажлаа л хийнэ шүү дээ.

-Буяны ажил, хандив тусламж өгөх нэрээр архины сурталчилгаа хийж байна. Энэ далд сурталчилгаа мөн үү?

-Мөн байлгүй яахав. Архи, согтууруулах ундааны сурталчилгаанд хяналт тавиад, хариуцлага тооцоод, хууль нь чангараад ирэхээр далд сурталчилгааны хэлбэр өөр болж байна. Мөн хөдөлгөөнт сурталгаа , архины амталгаат худалдаа ч  орно.

-Саяхан “Чингис” брэндийн нээлтэд Монгол Улсын Ерөнхий сайд оролцсон. Тэгэхээр Ерөнхий сайд ч бас далд сурталчилгаанд ороод байгаа юм биш үү?

-Тухайн архины нээлтийг хэвлэл мэдээллийн хэрэгслээр хэрхэн түгээж байгаагаас л шалтгаална. Уг арга хэмжээнд Ерөнхий сайд архины сурталчилгаа хийх гэж очоогүй. Үүнийг шууд хууль зөрчсөн гэж үзэх үндэслэлгүй юм.

-Тэгвэл Монгол стандарт архийг сурталчилсан олны танил хүмүүст арга хэмжээ авах  уу?

-Энэ бол яах аргагүй хууль бус сурталчилгаа. Олны танил хүмүүстэй биечилж уулзаж байна. Хуулийн дагуу арга хэмжээ авч, торгууль оногдуулдаг. Гэвч үүнийг тухайн компани л төлдөг. Тэглээ гээд олны танил хүмүүс архины далд сурталчилгаанд тоглохоос татгалзах хэмжээний ухамсартай байх хэрэгтэй л дээ.

-Архины сурталчилгаа хөдөө орон нутагт ч бий. Орон нутагт хэрхэн хяналт тавьж  ажиллаж байна вэ?

-Шударга өрсөлдөөн, хэрэглэг­чийн төлөө газрын одоогийн ажил­лаж байгаа бүрэлдэхүүн орон нутагт хүрч ажиллахад хан­галттай хүрэлцдэггүй. Тиймээс бид холбогдох байгууллагуудтай хамтран ажиллаж эхэлж байна гэв.

Сар шинийн баяр дөхөж буйтай холбогдуулан хуурамч архины худалдаанд хийсэн шалгалтын талаар Нийслэлийн цагдаагийн газрын дарга хурандаа С.Баатаржаваас тодруулахад “Ца­гаан сар” нэгдсэн арга хэм­жээний хүрээнд  1200 шил хуурамч архийг хураан авч устган хэргийг Эрүүгийн цагдаагийн газар шалгаж байна. Энэ арга хэмжээ ирэх сарын 17 хүртэл үргэлжилнэ” гэдэг хариултыг өгсөн юм. Дашрамд дуулгахад  олон хоног архи хэтрүүлэн хэрэглэснээс амь насаа алдах явдал эрс өсчээ. 2010 онд Шүүхийн шинжилгээний хүрээлэнгээс гаргасан тоо баримтаар 419 хүн метилийн спиртэд хордон нас барсан болох нь тогтоогджээ.