Японы их сумогийн тавдугаар сарын нацу башёгийн хоёр дахь өдрийн барилдаан өнөөдөр болно. Макүүчи буюу дээд зиндаанд барилдаж буй манай 10 бөх өнөөдрийн барилдаанд хэнтэй барилдахаар оноолт таарсан талаар танилцуулъя.
Башёгийн эхний өдрийн барилдаанд комүсүби Точиозанг ёрикири мэхээр төвөггүй давж, анхны даваагаа авсан их аварга Хакухо М.Даваажаргал өнөөдөр зүүн жигүүрийн маэгаширагийн тэргүүн бөх Тоёоношиматай барилдахаар оноолт таарсан байна. Харин озэки Харумафүжи Д.Бямбадорж баруун жигүүрийн маэгаширагийн хоёрт эрэмбэлэгдсэн Точиношинтой, Какурюү М.Ананд /М3/ комүсүби Точиозантай, Токитэнкү А.Хүчитбаатар /М6/ Китатайкитай тус тус учраа тааран барилдах бол манай бөхчүүд болох Хакуба А.Өнөржаргал /М5/, Асасэкирюдү Б.Дашням /М4/ нар хоорондоо барилдахаар оноолт таарчээ. Түүнчлэн Кёкүтэнхо Н.Цэвэгням /М7/ Коккайтай, Тамаваши Б.Мөнх-Оргил /М7/ Какизоэтэй, Моконами Г.Базарсад /М11/ Тосаюүтакатай, харин Коорюү Э.Мөнх-Оргил /М16/ Ёшиказэтай тус тус барилдана

С.Цэлмэг