МСБХ-ын “Сэнгүр” дээд лигийн тэмцээн өнөөдөр 18.00 цагаас Спортын төв ордны А зааланд эхлэх ёстой байсан боловч тодорхой шалтгааны улмаас хойшлогджээ. Сагсан бөмбөг сонирхогчдыг багагүй хугацаанд хүлээлгэсэн тэмцээн хойшилсон нь нөгөө  заалны асуудлаас болсон гэх.Уг нь долоо хоногийн эхээр эхлэх ёстой байсан боловч Монголд анх удаагаа хүчний гурван төрөлт буюу Пауэрлифтингийн Ази тивийн аварга шалгаруулах тэмцээн болсонтой холбогдуулан А заал сагсныханд олдоогүй. ОУ-ын тэмцээн гэж хүндэтгээд ингэж болох ч өнөөдөр эхлэх ёстой байсан тэмцээн яам, агентлагуудын тэмцээн болох учраас дахин хойшлогджээ.
Ер нь иймэрхүү байдлаар зөвхөн “Сэнгүр” лиг ч биш, “Спрайт” лиг, Волейболын лигийн тоглолтууд гээд товлосон, олон нийтэд хүлээгдсэн тэмцээнүүд хойшлогдон, сунжирсаар “Сэнгүр” лиг магадгүй наадамтай золгох бололтой. Одоо эхлээгүй байгаа Плэй-оффын тоглолтууд хэзээ дуусах нь тодорхойгүй. Мөн дундуур нь ямар нэгэн байгууллага хүч түрэн орж ирээд тэмцээнийг тасалдуулахгүй гэсэн баталгаа ч байхгүй юм. Хэрэв дундуур нь ямар нэгэн заалны асуудал дахин гарч ирэхгүй бол улирлын тоглолтуудтай адилаар долоо хоногийн гурван өдөр плэйоффыг явуулж,  зургадугаар сарын хагас гэхэд дуусахаар байна.