“Лондон-2012” олимпийн наадмын эрх олгох цувралын тэмцээний анхных болох Олон улсын жүдо бөхийн холбооны Тунисын гран-при тэмцээн өнөөдөр эхэлж байна. Энэ сарын 7-9-ний өдрүүдэд Тунис хотноо үргэлжлэх тус тэмцээнд дэлхийн 49 орны 349 тамирчин оролцож байгаагаас манай улсаас эрэгтэй найм, эмэгтэй хоёр жүдоч өрсөлдөнө.

Тэмцээний эхний өдөр буюу өнөөдөр эмэгтэйчүүдийн 48 ба 52 кг, эрэгтэйчүүдийн 60, 66 кг-ын жингийн барилдаан болох бөгөөд манай улсаас 48 кг-ын жинд М.Уранцэцэг, эрэгтэйчүүдийн 60 кг-д Ч.Болдбаатар, 66 кг-д Б.Хишигбаяр, Д.Дөлгөөн нар Тунисын дэвжээнд гарч барилдана.

М.Уранцэцэгийн тухайд эхний тойрогт гоц мөргөсөн бөгөөд эхний барилдаанаа Украйны бөх Тетьяна Лусниковагийн эсрэг хийх бол эрэгтэйчүүдийн 60 кг-ын жинд Ч.Болдбаатар Азербайжаны жүдоч Вугар Ширинлитэй эхний тойрогт барилдана. 66 кг-ын жингийн ангилалд хүч сорих манай тамирчдын тухайд Д.Дөлгөөн эхний тойрогт Португалийн Владимир Олейничтэй, харин Б.Хишигбаяр эхний тойрогтоо хийлж, дараагийн барилдаандаа Испанийн Хавьер Делгадотой барилдахаар сугалаа таарчээ. Барилдаан монголын цагаар 18.00 цагаас эхэлнэ.

С.Цэлмэг