Монголын жүдо бөхийн холбооноос өнөөдөр сэтгүүлчдэд мэдээлэл хийлээ. Хэвлэлийн хуралд Монголын жүдо бөхийн холбооны дэд ерөнхийлөгч, доктор Б.Пагва, тус холбооны ерөнхий нарийн бичгийн дарга М.Бөхбат, дасгалжуулагч  З.Шийрэв  нарын хүмүүс оролцсон юм. Монголын жүдо бөхийн холбооны дэд ерөнхийлөгч, доктор Б.Пагва Тайланд улсын Банкокг хотноо өнгөрсөн дөрөвдүгээр сарын 28-наас энэ сарын 2-ны өдрүүдэд болсон  өсвөр болон залуучуудын ази тивийн  аварга шалгаруулах тэмцээнд  Монгол улсаас 27 тамирчин оролцсоноос долоон алт, гурван мөнгө, 11 хүрэл медаль хүртсэн бахдам амжилттай ирснийг хэвлэлийн бага хурлын эхэнд онцоллоо.
Тэрбээр хэлэхдээ “Тэмцээний 70 кг-ийн жинд хүч үзсэн Ц.Наранжаргал бүх өрсөлдөгчөө цэвэр ялж, Азийн шилдэг жүдоч болсон. Гэхдээ бид олон медаль хүртсэн шүү гэж гайхуулахаар өнөөдөр цуглаагүй. Дэлхийд Монгол жүдочдыг мэддэг болсон байна. Гэтэл бид энэ тэмцээнд явахын тулд олон байгууллагаас хөрөнгө мөнгөний туслалцаа гуйж байж явсан. Монголчууд бид ирээдүйн олимпийн аваргуудаа гуйлга гуйлгаад явуулаад байх утгагүй байна. Дэлхийн бусад орнууд 2016 оны олимпийн наадамд өрсөлдөх тамирчдыг одооноос бэлтгэж эхэлсэн нь харагдаж байна.  Казахстан гэхэд 50 хүний бүрэлдүүнтэйгээр саяын тэмцээнд оролцож байна. Тиймээс цаашид олимпод медаль авах боломжтой спортын төрлүүдээ дэмжих хэрэгтэй. Мөн өсвөр, залуучуудын шигшээ багийг бүрдүүлэх шаардлагатай байна” гэдгийг онцлов.

Ц.Хишиг