Хойд Америкийн Үндэсний сагсан бөмбөгийн холбооны Бүх оддын тоглолт дахин “Мэжик”-ийн талбайд “шидтэй” болж өнгөрөх нь. Бүх оддын тоглолтын түүхэнд олон гайхалтай дурсамж үлдээсэн тэр цагаас хойш бүтэн 20 жилийн дараа “Орландо Мэжик” шинэ цэнгэлдэхдээ 2012 оны Бүх оддын тоглолтыг зохион байгуулах болсон талаар NBA-ын бүрэн эрхт төлөөлөгч Дэвид Стерн мэдэгдлээ. 1992 оны Бүх оддын тоглолтод домогт Мэжик Жонсон сагсан бөмбөгт эргэн ирж, MVP шагнал хүртсэн бөгөөд тухайн үед Бүх оддын тоглолт Орландод болж байсан юм. ХДХВ-ын халдвар авсан Жонсон их спортоо орхисон ч ер бусын шалтгаанаар эрүүлжиж, дахин талбайд ирж, Бүх оддын тоглолтыг чимсэн тэр гайхалтай мөчийг сагсан бөмбөг сонирхогчид тодхон санаж байгаа биз ээ.
Өнгөрсөн жилийн Бүх оддын тоглолт Финикст, энэ жилийнх Далласт, 2011 оны Бүх оддын тоглолт “ЛА Лейкерс”-ийн Стэплс центрт болох бөгөөд 2012 оных ийнхүү “Орландо Мэжик”-ийн будаг нь ханхалсан шинэ талбайд болохоор боллоо. “Орландо Мэжик Арена” нэрээр сүндэрлэх шинэ байгууламжийн шав тавих ёслол 2008 оны долдугаар сард болсон бөгөөд өдгөө барилгын ажил бүрэн дуусаагүй, 2010/11 оны улирлын тоглолтууд эхлэхээс өмнө ашиглалтад орох учиртай. Бүх оддын тоглолт 2012 оны хоёрдугаар сарын 26-нд болох бөгөөд 100 сая ам.долларыг энэхүү нэр хүндтэй арга хэмжээнд зориулахаар төсөвлөөд байна.
С.Цэлмэг