Австралийн ерөнхий сайд хатагтай Жулиа Гиллард ойрмогхон тус улсад болсон их үерийн улмаас учирсан хохирлыг арилгахад тусламж болгох зорилгоор дэмжлэгийн шинэ татвар бий болгож байгаагаа зарлав. Нийт сэргээн босголтод шаардагадх хөрөнгө ойролцоогоор 5.6 тэрбум ам.доллар болж байгаа гэж энэ үеэр зарласан байна. Энэхүү татварыг ирэх 7-р сарын 1-ээс эхлэх бөгөөд нэг жилийн хугацаатай иргэдээсээ авах болж байгаа юм.

 Харин үерт хохирсон иргэд энэ татварыг төлөхгүй юм байна. Хатагтай Гиллард хэлэхдээ “Бид өнөөдөр хийж болох зүйлээ маргааш болгон хойш тавьж болохгүй” гэж хэлжээ. Шинэ  татвар авах хувийг ч янз бүрээр тайлбарлаж бас олон талын шүүмж гарч байгаа юм. Зарим эх сурвалжийн мэдээлснээр бол жилдээ 50 мянгаас 100 мянга хүртэл австрали долларын орлоготой иргэдээс 0.5 хувийн татвар авах бол түүнээс дээш орлоготой иргэдээс нэг хувийн татвар авах гэнэ. Энэ ойролцоогоор 1.8 тэрбум ам.долларын хөрөнгө босгоно гэж хүлээгдэж байгаа аж.