Хэлэлцүүлгийн үеэр гишүүдийн дунд гадаад өр шир, зээл тусламжийн талаар эсрэг тэсрэг байр суурь уралдуулсан яриа өрнөсөн юм. Гишүүдийн асуултад Сангийн сайд С.Баярцогтын хариулснаас үзвэл Монгол Улсын нийт гадаад өр 2,8 их наяд төгрөгт хүрчээ. Өөрөөр хэлбэл, бүтэн нэг жилийн улсын нэгдсэн төсөвтэй дүйх шахам хэмжээний өртэй юм байна. Түүнээс 1,8 тэрбум төгрөг нь ам.долларын өр аж. Гадаад өрийн 31,7 хувь нь ам.доллар, 26,5 хувь нь иен, 28,1 хувь нь евро, 13,7 хувь нь бусад валютын өр юм байна.
Монакогийн Хант улсын Засгийн газартай хамтын ажиллагааны хэлэлцээр байгуулах асуудалд Н.Батбаяр Ц.Батбаяр нарын гишүүд нэлээд эргэлзэнгүй хандаж байлаа. Тус улстай Монгол Улс хоёр жилийн өмнөөс дипломат харилцаатай болжээ. Түүнээс хойш археологийн хайгуулын зориулалтаар 20 мянган ам.долларын нэг төсөл хэрэгжүүлсэн байна. Түүгээр Архангайн Заяын гэгээний хийдийг сэргээн засварлах, аймгийн төвөөс холгүй орших буган хөшөө, сүг зургийг судлах зэрэг ажил хийжээ. Одоо харилцаагаа үргэлжлүүлэхээр хамтын ажиллагааны хэлэлцээр байгуулах санал тавьсан байна. Н.Батбаяр гишүүн хааш хаашаа хоёр км нутаг дэвсгэртэй Монако улс Монголд туслахаасаа илүүтэй ашигт малтмалын хайгуул хийх, археологийн үнэт зүйлсийг авч гарахаас болгоомжлох хэрэгтэй гээд Европын холбоонд элсэх болзлоо хангаж буурай оронд тусалсан гэдэг нэр зүүх гэсэндээ хэлэлцээр байгуулах гэж байна хэмээн хэлж байв. Гуч хүрэхгүй сая төгрөгийн тусламжийн төлөө УИХ нь хэлэлцээр байгуулж байдгаасаа ичих хэрэгтэй гэсэн үгийг Ц.Батбаяр гишүүн хэлж байсан. Гэвч Европын холбоонд элсвэл Монголыг дэмжих орон нэгээр нэмэгдэнэ гэсэн байр суурь ч гарч байлаа.
Монгол Улсын Засгийн газар, Азийн хөгжлийн банк хооронд байгуулах Бүс нутгийн авто замыг хөгжүүлэх төсөл-нэмэлт санхүүжилтийн хэлэлцээрийн төслийг зөвшилцөх тухай хэлэлцэх үеэр мөн л гадаадын ашигтай ашиггүй зээлийн талаар ярилцлаа. Уг төсөлд тусгаснаар Чойр-Сайншанд-Замын-Үүд чиглэлийн авто замд энэхүү нэмэлт санхүүжилтийг авах ажээ. Энэ нь Монгол Улсын босоо тэнхлэгийн гол авто зам, Азийн авто замын сүлжээний Монгол дахь АН-3 чиглэлийн нэг хэсэг юм. Түүний хэсэг болох Замын-Үүд хүртлэх 61,8 км замыг Монгол Улсын Засгийн газар санхүүжүүлэх байсан ч эдийн засгийн хямралд өртсөнөөс саатжээ. Иймээс замын барилгын ажлыг гүйцээх зорилгоор Монгол Улсын Засгийн газар Азийн хөгжлийн банктай 43.1 сая ам.долларын хөнгөлөлттэй зээлийн хэлэлцээр хийж, АНУ-ын Мянганы сорилын корпорациар дамжуулан хэрэгжүүлэх 79.7 сая долларын буцалтгүй тусламжийн гэрээ байгуулжээ. Азийн хөгжлийн банктай тохиролцон, дээрх төслийн нэмэлт санхүүжилтэд найман сая ам.долларын зээл, 16 сая ам.долларын буцалтгүй тусламжийг авахаар тогтжээ. Зээлийн эргэн төлөгдөх хугацаа 24 жил, эхний найман жилд үндсэн төлбөрөөс чөлөөлж нэг хувийн хүүтэй, үлдсэн жилүүдэд жилийн хүү нь 1.5 хувь байх ажээ. Гишүүд нөхцөл заасан зээлээр гаднынхан Монгол Улсад хүү багатай зээл өгдөг ч өндөр хүүтэй бизнесийн зээлээс илүүтэй зардал гаргаж өөрийн ажилчдаа санхүүжүүлээд, өгсөн зээлээ буцааж аваад гардаг. Өрийг нь бид төлдөг хэмээн шүүмжилж байсан юм.
“Манай улс цаашдаа нөхцөл заасан зээл авахгүй, хөгжлийн зээл тусламж л авна” гэж Сангийн сайд хэлж байв. Мөн дан ганц тусламж хардаг орноос арилжааны зээл, тусламжийн аль алийг авдаг орон болох ёстойг ч хэллээ.
Д.ОЮУНЦЭЦЭГ