FIFA-гийн дэлхийн улс орны шигшээ багуудын чансааны жагсаалтыг дэлхийн таван удаагийн аварга бразилчууд тэргүүлж эхэллээ. Сүүлийн таван сар дараалан Европын аварга, яруу алдарт Испанийн шигшээ дэлхийн чансааг тэргүүлж байсан юм. FIFA-гийн дөрөвдүгээр сарын шинэчилсэн чансааны жагсаалтаар Бразилийн шигшээ баг ийнхүү долоо дахь удаагаа дэлхийн чансааны жагсаалтын эхэнд эрэмбэлэгдэж байгаа ба испаничууд нэг байр ухарч, хоёрдугаарт, харин Европын Бразил гэгддэг Португалийн шигшээ нэг байр ахиж, Голланд болон Италийн өмнө гуравдугаарт бичигдсэн байна. Түүнчлэн Герман, Аргентин, Англи, Хорват болон Францын шигшээ топ 10-г бүрдүүлжээ. Бразилийн хувьд 1993 оноос хойш нийт 142 сарын хугацаанд уг жагсаалтын тэргүүнд бичигдсэн юм.

Шигшээ багуудын хувьд дөрөвдүгээр сард олон улсын чанартай дөрөв, таван тоглолт л хийсэн бөгөөд тэдгээр тоглолтын үр дүнг харгалзан үзэж, шинэчилсэн жагсаалтыг гаргажээ.

Харин манай улсын тухайд FIFA-д бүртгэлтэй 207 орноос 36 оноогоор 180-р байрт эрэмбэлэгдсэн байна. Сануулахад, өмнөх сарын чансааны жагсаалтад манай улс 172-р байрт бичигдэж байсан юм.

Дэлхийн чансааг тэргүүлж буй топ 10 баг:

1.    Бразил – 1611 оноо
2.    Испани – 1565 оноо
3.    Португаль – 1249 оноо
4.    Голланд – 1221 оноо
5.    Итали – 1184 оноо
6.    Герман – 1107 оноо
7.    Аргентин – 1084 оноо
8.    Англи – 1068 оноо
9.    Хорват – 1052 оноо
10.    Франц – 1044 оноо

С.Цэлмэг