Азербайжаны нийслэл Баку хотноо AIBA буюу Олон улсын сонирхогчдын боксын холбооны залуучуудын дэлхийн аварга шалгаруулах тэмцээн үргэлжилж байна. Манай тамирчдаас өчигдөр Н.Төгсцогт, Б.Билгүүн, Ц.Отгон-Эрдэнэ, Г.Болдхуяг нар Бакугийн рингэнд гарч тулалдсанаас 54 кг-ын жинд тоглож буй дэлхийн аваргын мөнгөн медальт Н.Төгсцогт Молдавын боксчин Вадим Иваниучийг буулган авснаар шөвгийн 16-д шалгарсан байна. Манай тамирчин өнөөдөр Тайландын Бунярак Ампайраттай нударга зөрүүлнэ. Мөн өчигдөр хамгийн хөнгөн буюу 48 кг-ын жинд өрсөлдсөн Б.Билгүүн эхний тулаанаа Румыны боксчин Стефан Касларовын эсрэг хийсэн юм. Эхний тойрогт гоц мөргөж, улмаар Румыны тамирчинтай учраа таарсан Б.Билгүүн 5:2 харьцаатай ялагдсанаар тэмцээнээ дуусгасан бол 75 кг-ын жинд Г.Болдхуяг Кубын тамирчинд ялагдснаар мөн энэ удаагийн дэлхийн аваргын тэмцээнийг өндөрлүүлжээ.
Харин Ц.Отгон-Эрдэнийн /64 кг/ тухайд Непалын  тамирчин Сажан Шахитакуриг 25:0 харьцаатай илт давуу хожсон бөгөөд өнөөдөр Украйны Олег Неклиудовтой тулалдах юм. Мөн өнөөдөр манай ширэн бээлийтнүүдээс 57 кг-ын жингийн ангилалд Д.Ананд Германы Артур Брилтэй нударга зөрүүлнэ.

С.Цэлмэг